شال ءُ کراچی ءَ نمیرانیں صباء دشتیاری ءِ دوازدھمی نمیرانی سالروچ ءِ درگت ءَ مراگش

بلوچستان ءِ بنجاھی شھر شال ءُ کراچی ءَ نمیرانیں صباء دشتیاری ءِ نمیرانی ءِ دوازدھمی سالروچ ءِ درگت ءَ مراگش برجم دارگ بوتگ ءُ چاگردی ترامجاہ ٹویٹر ءَ اسپیس کنگ بوتگ –

نمیرانیں صباء دشتیاری ءِ یات ءَ ماں شال ءَ نیشنل ڈیموکریٹک پاٹی شال ءِ ھنکین ءِ نیمگ ءَ یک لیکچر پروگرام ءِکہ شال ھنکین ءِ آرگنائزر نزر مری ءِ سروکی ءَ برجم دارگ بوتگ، مراگش ءِ گچینی مھمان آرگنائزنگ کمیٹی ءِ باسک سلمان بلوچ، اشفاق بلوچ ءُ غنی بلوچ بوتگ انت ءُ پروفیسر ڈاکٹر منزور بلوچ ءَ نمیرانیں صباء دشتیاری زند ءِ درگت ءَ باسک لیکچر داتگ انت – وھدیکہ ماں کراچی ءَ سید ھاشمی ریفرنس کتابجاہ ءِ ماڑی دھکان باگ ملیر ءَ ھم صباء ءِ یات ءَ مراگش ءِ برجم دارگ بوتگ ءُ اودا مزنیں کچے ءَ مردماں بھر زرتگ –

شال ءِ مراگش ءَ پروفیسر منظور بلوچ ءَ تران کنان ءَ گوشتگ کہ مارا پھر انت کہ ورنا وتی راج ءِ یک رھشونے ءَ دروت ندر کنگ ءَ انت – بلے ادا یک جست ءِ ودی بیت کہ مئے ھمینچو کہ رھشون بوتگ انت آھانی دروت ندر کنگ ءِ درساں جوانتریں کار کجام انت، مارا بس ھما یات کنگی انت ، آیانی روچ دارگی انت، ھما مولانی ھاتر ءَ آھاں وتی زند گوازینتگ ھما مولانی ھاتر ءَ آھاں وتی جانانی دیمھونی داتگ انت ھما جوانتر انت؟ یا بس آیانی درگت ءَ مارا ھما سرپدی رستگ انت آیاں دومیانی گوم ءَ شئیر بہ کنیں یا اش سرجمی ءَ فکر ءِ دروشم ءَ یکجاہ کنگ ءُ درسیں مردمانی دیما آرگی انت –

آئی ءَ گوشتگ کہ اگاں صبا دشیتاری ءِ گپ کنگ بہ بیت آ یک نترس ءُ دلیریں مردمے بوتگ – بازیں مردماں آئی ءَ گوشتگ کہ تو جنگ بہ ئے؟ گڈا صبا ءَ گوشتگ کہ منی مرگ ءَ چہ بلوچ راج ھلاس نہ بیت – ادا مردماں اے ھم گوشتگ کہ اگاں صبا زندگ بہ بوتیں آئی ءَ گیشتر کار کتگ ات – بلے ٹوھیں مردمانی وتی جتائیں مزاج ءُ رھبند بنت – آ دلیر وا بنت ءُ نترسی ءَ پیسلہ زور انت – اے ناکہ جزباتی پیسلہ کن انت – ھنچوش کہ نواب نوروز خان ءُ نواب اکبر خان بگٹی کہ وتی گڈی وھد ءَ اِتاں بلے ناکہ آ جزباتی تاں پرچاکہ اے اُمر ءَ آ جزباتی نہ بنت شعوری پیسلہ زور انت –

صبا ءَ ترس وتی پادانی چیر ءَ کتگ ات ھما نہ ترسی کہ مردماں دانا بہ کنت ھمائی لوٹ انت – اتھارٹی ءِ کار مردمانی تھا ترس پیداک کنگ – ءُ صباء ءِ پیگامے کہ ترس بے سوب کنگ بہ بیت نہ ترسی کہ دانائی ءِ گوم ءَ بہ بیت – ترس تخلیقی تاکت ءَ پچ گپت – انسان کہ وتی رھبنداں سرا بوت نہ کنت گڈا آئی ءِ وشی پہ درست پہ زوال انت –

منظور بلوچ ءَ گوشتگ کہ ھیرانی ءِ گپ اش انت کہ وھدیکہ ھمے چاگرد بابا مری ءَ پیداک کت کنت، نمیرانیں نواب بگٹی ءَ پیدا کت کنت، سردار عطاء اللہ مینگل ءَ پیداک کت کنت، نمیرانیں صبا دشتیاری، نمیرانیں غلام محمد ءَ ودی کت کنت دگہ باز ھست کہ من آیانی نام ءَ گران بہ کناں بوت کنت دم بہ براں – گڈا جست ایش انت گڈا اے چاگرد لیٹریچر ءِ تہ ءَ پرچا سنٹ انت، اودا پرچا اے چاگرد مزنیں مردم ودی کت نہ کنت، گڈا اشی ءِ متلب ھمیش انت کہ ادا ھما کہ مزاحمت ءِ بنجاہ انت آئی ءِ روایت گیشتر مھکم انت چہ لٹریچر ءَ گیش – مزاحمت مروچی ھم ھست انت، اگاں چارگ بہ بیت گڈا درساں پیش لٹریچر کئیت، درساں پیش زانت کار کئیت، بلے ادا شمے جھدکار پیش ءَ کائنت، مھلوک ھم دیما انت المیہ اش انت کہ سوکالڈ دانش ور درساں پشت انت –

آئی ءَ گوشتگ کہ درساں مستریں جست اے چست بیت کہ صباء کجام چیز ءَ صبا جوڈ کتگ، اگاں صباء ءَ اے دیمھونی مہ داتیں گڈا صباء بوتگ ات؟ آیا آئی ءِ لبزانک سرجمیں بلوچستان یا دنیائے ھر کنڈ ءَ آئی ءِ نام ھست انت درست اسرمند کتگ اِتاں؟ اگاں صبا ءِ زند ءِ تہ ءَ اے گھگیری ءُ سیاسی پیریڈ در بہ کنیں گڈا صباء ءِ تہ ءَ دگہ چی پشت کپیت – مارا اے چارگی انت ءُ پھمگی انت صباء ءِ تہ ءَ کجام چیز بوتگ انت کہ آ نہ ترسیں مردمے جوڈ کتگ، کہ آئی ءَ پہ مراعات نیمگ ءَ یک چمے چست نہ کتگ ءُ نہ چار اِتگ ، صبا ھما مردم بوتگ کہ ھمے شھدربرجاھے تہ ءَ واکدارانی تہ ءَ ھچ کس ءَ گوں سیادی ءِ نہ بوتگ اگاں آئی ءِ سیادی بوتگ گڈا گوں لٹریچر ءِ سوب ءَ، آئی ءِ گیشتریں سنگت، نودربر، چوکیدار، مالی ھرکسے ءِ گوما نزیک بوتگ یا بوت کنت آئی ءَ گوں ھم ھیالیں مردماں سنگتی بوتگ – صباء ءِ زند ءَ چہ شما سک باز چیز در بُرت کن یے – مارا لوٹیت کہ ما چہ آئی ءَ در بہ بریں، آئی ءَ بہ زانین، پجاہ بیاریں، آئی زند ءَ نبشتہ بہ کنیں تانکہ آؤکیں پدریچ ھم صبا ءِ زانگ ءُ زانت ءَ نزیکی بہ کنت پرچاکہ وھدیکہ شما زانت ءَ گوں نزیکی نہ کنیے گڈا بے ترسیں مردمانی سرا اتھارٹی ءَ برجاہ دارگ ارزان نہ انت – صبا ءِ زندے شوکتریں بھر کہ مناں گندگ ءَ کئیت آ اش انت کہ آئی ءَ ترس بے سوب کتگ ءُ ءُ یک دانائی ءِ دروشم ءَ وتی جان ءِ دیمھونی داتگ –

دومی نیمگ ءَ ماں کراچی ءَ ھم نمیرانیں صبا دشتیاری ءِ دوازدھمی سال روچ ءِ درگت ءَ دیوان ءِ کہ سید ھاشمی ریفرنس کتابجاہ ءِ ماڑی دھکان باگ ملیر ءَ برجم دارگ بوتگ – اے دیوان ءَ مزنیں کچّے ءَ مردماں بھر زُرتگ-

کراچی دیوان ءِ سَے بھر بوتگ انت – اولی بھر استاد صبا دشتیاری ءِ پٹ پولکاری کارانی سرا گشتانک، دومی صبا داد ءُ سَیمی لچّھی بھر بوتگ انت –

اولی بھر ءِ جارچین واجہ بشیر واحد بلوچ ات، اے بہمھر ءِ تہ ءَ زانتکار ءُ کواس استاد اصغر علی آزگ، اسحاق خاموش، بانک زاھدہ رئیسی ءَ گوشتانک داتگ انت، ءُ دیوان ءَ پروفیسر اے آر داد ءِ گوشتانک توار بند ءِ دروشم ءَ گوشدارینگ بوتگ ءُ واجہ رحیم مہر ءِ گوشتانک واجہ غلام رسول کلمتی ءَ دیوان ءِ دیم ءَ ونتگ – گوشتانک ءِ گڈ سرا کتابجاہ ءِ کماش واجہ اکبر ولی ءَ مھمانانی منت گپت ءُ نمیرانیں صبا دشتیاری ءِ پٹ پولی کارانی دیم برگ ءِ ھاتر ءَ جھد ءِ لوٹ کُرتگ –

دیوان دومی بھر صبا داد ات، اے درگت ءَ سال 2023 ءِ صبا داد بلوچ زالبولانی بلوچی زبان ءِ ھزمت ءَ نامینگ بوتگ ات ، اے داد بانک زاہدہ رئیسی راجی ءِ بلوچی زبان ءِ ھزمتانی سرا بانک ءَ دیگ بوتگ –

دیوان ءِ سیمی ءُ گڈی بھر لچّھی بھر بوتگ ، لچّھی بھرے جارچین اقبال ھاشمی بوتگ، لچّہمھی بھرے پاگواجہ اصغر علی آزگ بوتگ –
لچھی بھرے گچینی مھمان ظفر کریم، اسحاق خاموش، ڈاکٹر خالق، عاصم زھیر ءُ لقمان حکیم بوتگ انت – ابید چہ گچینی مھماناں ایندگہ نودربر ءُ لچّہ کاراں وتی لچّہ دیوان ءَ درشان اِتگ انت –

ھمے وڈ نمیرانیں صباء دشتیاری ءِ نمیرانی ءِ دوازدھمی سالروچ ءِ درگت ءَ ماں جھان ءِ کنڈ کنڈ ءَ نشتگیں بلوچ سوشل میڈیا ایکٹوسٹاں ماں چاگردی ترامجاھ ءَ صبا دروت ندر کتگ ءُ ماں ٹویٹر اسپیس ءَ دیوان ءِ برجم دارگ بوتگ کہ اودا مردماں صبا ءِ زند ءِ سر ءَ وتی ھیال درشان اِتگ انت –