کیچ: مارٹر گولہ ءِ لگگ ءَ یک مردمےزدگ

ھالانی رِد ءَ بلوچستان ءِ دمگ کیچ ءِ ھنکین کولواہ ڈانڈار ءَ مارٹر گولہ ءِ لگگ ءَ یک مردمے زدگ بوتگ –

دمگی واکدارانی رِد ءَ مروچی آدینگ ءِ بیگاہ ءَ ناشناسیں نیمگے ءَ آس دیگ بوتگیں مارٹر گولہ ءِ پچکے ءِ لگگ ءَ علی بخش ء احمد نامی شوانگ ءِ زدگ بوتگ کہ پہ الاج ءِ ھاتر ءَ ٹیچنگ نادراھجاہ تربت ءَ آرگ بوتگ کہ آئی ءِ الاج بوگ ءَ انت –

بلے تنی وھدی اے زانگ نہ بوتگ کہ مارٹر چہ کجام نیمگ ءَ اتکگ- زانگ بہ بیت اے ھند ءُ دمگانی مردم پوج ءِ سر ءَ الزام جن انت کہ مدامی آھانی مارٹر گولہ آس دیگ بیت –

زانگ بہ بیت سال دوھزار بیست ءُ یک ءِ دھ اکتوبر ءَ کیچ ءِ دمگ ھوشاپ ءَ ھم چہ نزیکیں پوجی پانگس ءَ مارٹر گولہ آس دیگ بوتگ ات کہ چریشی ءَ ھپت سالی زھگ اللہ بخش ء عبدالواحد ءُ پنچ سالی جنکو شراتون ء عبدالواحد ھما جاہ ءَ بیران بوتگ اِتاں وھدیکہ مارٹر گولہ ءِ پچکانی لگگ ءَ مسکان ء وزیر سک باز زدگ بوتگ ات –