آئی پی ایل 2023: آر سی بی ءَ کوہلی ءِ سنچری بدولت ءَ گوازی کٹ اِتگ، کلاسین سنچری پہ مپت

انڈین پریمئیر لیگ ءِ شست ءُ پنچمی گوازی ءَ رائل چیلنجر بنگلور ءِ ٹیم ءَ وراٹ کوہلی ءِ IPL ءِ تہ ءَ ششمی سنچری ءُ فاف ڈوپلیسس نیم سنچری بدولت ءَ سن رائزرس حیدرآباد پروش داتگ – حیدر آباد ءِ داتگیں یکسد ءُ ھشتاد ءُ ھپت رنانی ٹارگٹ بنگلور ءَ دو وکٹانی تاوان ءَ پروشتگ ءُ گوازی کٹ اِتگ – اے گوازی ءِ کٹگ ءِ ھمراھی ءَ آر سی بی ءِ سینزدہ گوازیانی تہ ءَ چاردہ پوئنٹ ءَ سر بوتگ انت ءُ آ پوئنٹ ٹیبل ءِ تہ ءَ چارمی لمبر ءَ انت –

پہ ٹارگٹ ءِ پروشگ ءَ آر سی بی ءِ اوپننگ ءَ کوہلی ءُ ڈو پلیسس اتکگ انت ھردوکاں یکسد ءُ ھپتاد ءُ دو رند ھواری ءَ جوڈ کتگ – کوہلی ءَ شست ءُ سَے بالاں دوازہ چوکا ءُ چار جکا جتگ ءُ سنچری کتگ وھدیکہ ڈوپلیسس ءَ ھپتاد ءُ یک رن جوڈ کتگ ءُ ناٹ آؤٹ بوتگ – آئی پی ایل ءِ تہ ءَ اے کوہلی ءِ ششمی سنچری انت – کوہلی ءُ وت ءَ کرس گیل ءِ برابری ءَ آورتگ – گیل ءَ ھم آئی پی ایل ءِ تہ ءَ شش سنچری کتگ –

اولسر ءَ بیٹنگ کنان ءَ حیدر آباد ءَ ہینرک کلاسین ءِ سنچری ءِ بدولت ءَ آر سی بی ءِ دیم ءَ پنج وکٹانی تاوان ءَ یکسد ءُ ھشتاد ءُ شش رن جوڈ کتگ – کلاسین ءَ پنجاہ ءُ یک بالاں شش چکا ءُ ھشت چوکا جتگ ءُ یکسد ءُ چار رند جوڈ کنگ ءَ ابید ایڈن مارکرم 18 رنانی ھمراھی ءَ ھپتاد ءُ شش رن ھواری ءَ جوڈ کتگ وھدیکہ ہیری بروک ءِ ھپتاد ءُ چار رن ھواری ءَ جوڈ کتگ – کلاسن ءَ جوانی ءَ گوازی کنان ءَ پہ حیدر آباد ءِ ھاتر ءَ پنجاہ ءُ یک بالاں یکسد ءُ چار رند جوڈ کتگ ءُ ٹیم ءِ ایندگہ بیٹسمیناں شست ءُ نھ بالاں بس ھشتاد ءُ دو رن جوڈ کتگ –

آر سی بی ءِ نیمگ ءَ مائیکل سوبمندتریں بالر بوتگ کہ آئی ءَ سینزدہ رن داتگ ءُ دو وکٹ گپتگ – محمد سراج ءَ چار اووراں ھبدہ رن داتگ ءُ یک وکٹ ءِ گپتگ ءُ کرن ءَ سَے اووراں چِل ءُ پنچ رن داتگ –