بلوچ راجدوستیں پاٹی سرکار ءِ دومی ٹولی جوڈ بوتگ انت – ماما قدیر

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، اے درجکشیں زھرشانی بنجل ءَ مروچی پنچ ھزار ءُ چِل ءُ ھشت روچ سرجم بوتگ انت کہ شال پریس کلب ءِ دیم ءَ برجاہ انت، مروچی بی این پی نوشکی ءِ باسک خورشید جمالدینی، صادق علی ءُ دگہ مردماں بنجل ءَ اتکگ ءُ بیگواھین مردمانی کھولاں گوں دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بیگواھیں مردمانی کھول وڈ وڈا زھرشانی کنان ءُ پیداک انت، آھانی بس یکیں لوٹ انت کہ آھانی دوستیگیں مردم یل کنگ بہ بنت، آ ملک ءِ جوڈ کتگیں آمیدگساں پیش کنگ بہ بنت آگاں آھانی سر ءَ کتکاری ءِ الزام ءِ بوت گڈا سزا دیگ بہ بنت بلے آ اے وڈ سالاں سال بیگواہ کنگ مہ بنت، بلوچستان ءِ سرکار بیگواھیں مردمانی کھولانی گپ ءِ گوشدارگ ءُ آھانی لوٹانی سر ءَ گامگیج زورگ ءِ بدل ءَ دوسری مردم آوار جنگ ءُ بیگواہ کنگ ءَ انت –

آئی ءَ گوشتگ کہ پاکستان ءِ گوستگیں مزن وزیر ءُ آئی ءِ وزیراں وتی اقتدار ءَ زورانسری آوار جنی ءَ ملکی ادارہ ءُ ایجنسی کانودی جواز داتگ انت، آھاں زورانسری آوار جنگ بوتگیں مردمانی کھولانی مسکرا کتگ، مروچی ھماھانی جند ءِ سر ءَ کپتگ – اے ھک ءِ گرگ انت کہ مروچی پاکستانی مھلوک ریاستی پوج ءُ آئی ادارھانی زوراکیانی درگت ءَ گپ جنگ ءَ انت –

آئی ءَ گوشتگ کہ پاکستانی ھاکم زلت ءُ رزوائی ءَ ابید دگہ ھچ نہ رستگ، مرچی باند ءَ یک وتگڈیں راجدوستیں پاٹی ءں سرکار ءِ دومی ٹولی جوڈ بوتگ کہ ھستیں وھدے زوراکاں وش کنت ءُ وتی اقتدار ءَ گیش کنگ لوٹیت –