بلوچستان ءَ انسانی ھکانی لگتمالی گیش بوان انت – ماما قدیر بلوچ

شال ءِ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ پنچ ھزار ءُ چِل ءُ ھپت روچ سرجم بوتگ انت – مروچی چہ منگچر ءَ سیاسی ءُ چاگردی باسک برکت حسین بلوچ، محمد بلوچ ءُ دگہ مردماں اتکگ ءُ بیگواھیں مردمانی کھولاں گوں دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ بلوچستان ءَ ھپتاد سالیں کہ انسانی ھکانی لگتمالی بوگ ءَ انت کہ اشی ءِ تہ ءَ ھمک روچ گیشی آیان انت، بلوچ پرزندانی زورانسری آوار جنی ءُ لٹ کُٹ ءُ پدا درکانودی کُشت ءُ کوش ھمک روچی کارے جوڈ بوتگ –

آئی ءَ گوشتگ کہ بلوچستان ءَ ھچ کس یا کھول ءِ نیست کہ آ انسانی ھکانی لگتمالی آماچ نہ بوتگ، ورنا، کماش زھگ ءُ زالبول ھر تک یُ پھناتاں سیادی داروکیں بلوچانی زند ازاب تہ ءَ گوزگ انت آھانی سر ءَ بے کساس زور کامرز بوگ انت چریشی ءَ بازیں کھولاں وتی ننگ ءُ ناموس چادر ءُ چاردیوالی ھاتر ءَ در پہ دری زند گوازینگ ءَ لاچار بوتگ انت –

آئی ءَ گوشتگ کہ سال دوھزار نُھ ءِ بندات ءَ زورانسری آوار جنی ءُ درکانودی کشت ءُ کوش ءِ تہ ءَ گیشی آرگ بوتگ، کہ کساس شست ھزار بلوچ ھمے ھاتر ءَ زورانسری آوارجنی ءِ آماچ بوتگ انت کہ آھانی سیادی چہ راجکاری ءَ بوتگ ھزارانی کچ ءَ ژانگولیں جونانی دست کپگ انسانی ھکانی مزنیں لگتمالی ءِ کہ ھچ کس اشی ءَ انکار کت نہ کنت –

ماما قدیر بلوچ ءَ گوشتگ کہ گیشتریں جونانی دست کپگ ءُ آھانی ڈی این اے نہ کنگ ءُ بے وارس گوشگ پھم ڈن انت – ھر ھما سرکار کہ بلوچستان ءَ زورانسری آوار جنی ءِ جیڑہ ءَ سارت کنگ ءُ اے وڈیں وئیلاں ھواریں کتکاریں ادارھاں بری الزمہ گوشگ ءِ کوشست ءَ کنگءَ انت – اے کتکاریاں بلوچستان ءِ سرکار، سی ٹی ڈی ءُ ایف سی ھوار انت – ژانگولیں جونانی دست کپگ، یکجاھیں کبر پہ بلوچستان ءَ نوک نہ انت چدوپیسر ھم توتک، پنجگور، ڈیرہ بگٹی ءُ بلوچستان ءِ جنگزدگیں دمگاں یکجاھیں کبر دست کپتگ انت کہ آ بیگواھیں مردمانی بوتگ انت ءُ مروچی ھم دست کپوکیں جون ھما مردمانی انت کہ بلوچستان ءَ زورانسری آوار جنگ ءُ بیگواہ کنگ بوتگ انت –