شال: بیگواھیں مردمانی کمیشن ءِ جج ءِ رویش بلوچ گلاں ترندی ءَ گوں ایرجتگ

بلوچستان ءَ زورانسری آوارجنیانی درگت ءَ جوڑ کنگ بوتگیں کمیشن ءِ شنوائی ءِ میان ءَ اے گپ دیم ءَ آیگ انت کہ جج ءِ نیمگ ءَ بیگواھیں مردمانی کھولانی گوم ءَ در انسانی رویش دارگ بوگ ءَ انت –

ھالانی رِد ءَ شال ءَ کمیشن ءِ جج ریٹائرڈ فضل الرحمان ءَ بیگواھیں بلوچ باسک راشد حسین ءِ مات ءِ گپ گوش نداشتگ ءُ آمیدگسی کار ماٹو کتگ انت –

اے درگت ءَ ماں چاگردی ترامجاھاں بیگواھیں بلوچ باسک راشد حسین گھار فریدہ ءَ بلوچ ءَ گوشتگ کہ گوستگیں روچ ءَ ماں شال ءَ بیگواھیں مردمانی کمیشن ءَ زورانسری آوار جنگ بوتگیں آئی ءِ برات ءِ درگت ءَ آئی ءِ مات ءِ پیشی بوتگ بلے پدا ھم کمیشن ءِ جج فضل الرحمان ءَ اے میان ءَ کیس ءِ گوشدارگ ءِ بدل ءَ آئی مات ءِ گوم ءَ در کانودی ءُ در آمیدگسی رویش داشتگ ءُ آ گوشنداشتگ –

آئی ءَ گوشتگ کہ کمیشن ءِ جج فضل الرحمان ءَ راشد حسین ءِ کیس ءَ باز رند ءَ آئی ایس آئی والا آمیدگس ءَ لوٹاریں اِتگ انت ءُ منی مات بیھار داتگ –

آئی ءَ اے الزام ھم جتگ کہ اے جج ءِ ھمراھی ءَ مدامی پنچ یا شش چیریں ادارھانی کارمند آمیدگس ءَ پیشی ءِ میان ءَ کائنت ءُ بیگواھیں مردمانی کھولاں بے نپیں جست کن انت ءُ آھاں دلسیاہ کن انت –

زانگ بہ بیت جسٹس ریٹائرڈ فضل رحمان سال دوھزار ھژدہ ءَ وفاقی سرکار ءَ بلوچستان ءَ بیگواھیں مردمانی کمیشن ءِ سنئیریں باسک کتگ چدوپیسر آ بلوچستان ہائی کورٹ ءُ فیڈرل شریعت کورٹ ءِ جج بوتگ ءُ بیگواھیں مردمانی کمیشن ءِ سروکی ءَ ابید الیکشن کمیشن ءِ باسک ھم بوتگ –

اے درگت ءَ بلوچ نیشنل مومنٹ ءِ انسانی ھکانی ادارہ “پانک” ءَ گوشتگ کہ بلوچستان ءَ زورانسری آوار جنگ بوتگیں مردمانی درگت ءَ جوڈ کنگ بوتگیں کمیشن ءِ تہ ءَ فضل الرحمان ءِ وڈیں پوجی ججانی ساڑی بوگ گیشتر دلسیاھی سوب جوڈ بوتگ – کمیشن جج ءَ وتی زھگ ءِ آوار جنی ءِ کیس ءِ میان ءَ یک گمزگیں ماتے ءِ کمشرپی کتگ کہ آ انسانی وقار ءِ بگیری دارگ ءِ زانگ بیت –

آئی ءَ گوشتگ کہ بیگواھیں مردمانی کمیشن ءَ فضل الرحمان وڈیں ججانی آرگ ھمے پدر کنت کہ استان بیگواھیں مردمانی یل کنائینگ ءَ ھچ سنجیدگ نہ انت –

ہیومن رائٹس کونسل ءِ جارکش عبداللہ عباس ءَ اے وئیل ترندی ءَ گوں ایرجتگ ءُ گوشتگ کہ زورانسری آوار جنگ بوتگیں مردمانی درگت ءَ جوڑ کنگ بوتگیں کمیشن ءَ نشتگیں اے جج ءَ چدوپیسر ھم بازیں بیگواھیں مردمانی کھولانی گوم ءَ اے وڑیں رویش داشتگ – بیگواھیں مردمانی کمیشن ءَ روچ مروچی یک مردمے ءِ کیش ھم گیشگوار نہ کتگ اے کمیشن بس بیگواھیں مردمانی کھولاں کم شرپ کنگ ءِ ھاتر ءَ جوڑ کنگ بوتگ اے کمیشن ھلاس کنگ بہ بیت –

دومی نیمگ ءَ چاگردی ترامجاھاں بلوچ سیاسی ءُ چاگردی باسک اے لوٹ ءَ.کنگ ءَ انت کہ کمیشن ءِ جج فضل الرحمان اگدہ پچ گرگ بہ بیت ءُ کمیشن ءَ بیگواھیں مردمانی کھولانی گوم ءَ در انسانی رویش ءِ گرءُدار کنگ بہ بیت –

زانگ بہ بیت چدوپیسر ھم بیگواھیں مردمانی کمیشن ءِ گوں بیگواھیں مردمانی کھولاں گوً اے وڈیں رویش دارگ ءِ رپورٹ اتکگ انت کہ اودا بلوچ زالبول ترسینگ بوتگ انت ءُ اے ھم گوشگ بوتگ انت کہ وتی دیم ءَ چادر ءَ دور بہ کن ات –

بلے پدا ھم اے وئیلانی رپورٹ بوگ ءَ ابید ھم ھچ وڈیں گامگیج زورگ نہ بوتگ –