آئی پی ایل2023: ایل ایس جی ءَ حیدرآباد ءِ دیم ءَ ھپت وکٹ ءُ پنجاپ ءَ ڈی سی دیم ءَ سی ءُ یک رناں گوازی کٹ اِتگ انت

انڈین پریمئیر لیگ ءِ شانزدھمی سیزن ءِ پنجاہ ءُ ھشتمی گوازی لکھنو سپر جائنٹس ءَ سن رائزرس حیدرآباد ءِ دیم ءَ ھپت وکٹاں کٹ اِتگ وھدیکہ پنجاہ ءُ نھمی گوازی ءَ پنجاپ کنگز ءَ دھلی کیپیٹل سِی ءُ یک رناں پروش داتگ –

پنجاہ ءُ ھشتمی گوازی ءَ ھیدر آباد ءِ نیمگ ءَ دیگ بوتگیں ھشتاد ءُ سَے رنانی ٹارگٹ لکھنو ءَ نوزدہ اوور ءُ سَے وکٹانی تاوان ءَ ہروشتگ ءُ یکسد ءُ ھشتاد ءُ پنچ رن جوڈ کتگ – اے کٹگ ءِ ھمراھی ءَ لکھنو ٹاف 4 سر بوتگ لکھنو ءِ دوازدہ گوازیانی تہ ءَ سینزدہ پوئنٹ ءَ سر بوتگ انت –

پہ ٹارگٹ ءِ پروشگ ءَ لکھنو ءِ بندات جوان نہ بوتگ کہ کائل میئرس ءَ دوازدہ اسکور ءِ سر ءَ کپتگ – مئیرس ءَ چاردہ بالاں بس دو رن جوڈ کتگ بوتگ – کوئنٹن ڈی کاک ءَ بیست ءُ نُھ رن جوڈ کتگ ءُ واپس بوتگ اشاں پد پریرک ءُ مارکس ءَ اسکور یکسد ءُ بیست ءُ ھپت ءَ سرکتگ پدا پورن اتکگ ءُ آئی گوازی کٹاریں اِتگ پورن ءَ سینزدھ بالاں چل ءُ چار رن جوڈ کتگ ءُ ناٹ آؤٹ بوتگ-

چدوپیسر اولسر ءَ بیٹنگ کنان ءَ سن رائزرس حیدراباد ءِ ٹیم ءَ ہینرک کلاسن ءُ عبدالصمد ءِ بدولت ءَ شش وکٹانی تاوان ءَ یکسد ءُ ھشتاد ءُ دو رن جوڈ کتگ – کلاسن ءَ بیست ءُ نھ بالانی تہ ءَ سَے چوکا ءُ سَے چکا جتگ وھدیکہ عبدالصمد ء بیست ءُ پنچ بالاں سَے چوکا ءُ چار چکا جتگ ھردوکاں چِل بالاں پنجاہ ءُ ھشت رن ھواری ءَ جوڈ کتگ –

لکھنو ءِ ھاتر ءَ کپٹن کرونال ءَ چار اووراں بیست ءُ چار رن داتگ ءُ دو وکٹ گپتگ آئی ءَ سینزدھمی اوور ءَ پد ماں پد اے وکٹ گپتگ انت ءُ یدھویر، آویش خان، یش ٹاکر ءُ امت مشرا ءَ ھم یک یک وکٹ ءِ گپتگ –

آئی پی ایل ءِ پنجاہ ءُ نھمی گوازی پنجاپ کنگز ءُ دھلی کیپیٹل ءِ میان ءَ بوتگ کہ پنجاپ کنگز ءَ سِی ءُ یک رناں گوازی کٹ اِتگ –

پنجاپ کنگز ءَ اولسر ءَ بیٹنگ کنان ءَ بیست اوورانی تہ ءَ ھپت وکٹانی تاوان ءَ یکسد ءُ شست ءُ ھپت ٹارگٹ ایر کتگ کہ دھلی کیپیٹل ءَ اے ٹارگٹ پروشت نہ کتگ ءُ آئی ءَ بس بیست اوورانی تہ ءَ ھشت وکٹانی تاوان ءَ یکسد ءُ سِی ءُ شش رن جوڈ کرت کتگ ءُ گوازی برگ ءَ بے سوب بوتگ –