قلعہ سیف اللہ ءَ پوجی ہیڈ کوارٹر ءِ سر ءَ آپریشن سرجم، چل کارمند مرتگ انت – ٹی جے پی

تحریک ءِ جھاد پاکستان ءَ بلوچستان ءِ دمگ مسلم باگ ءَ پاکستانی پیراملٹری فورس فرنٹئیر کور ءِ ھیڈ کوارٹر سر ءَ بوتگیں اُرش ءِ زمہ واری منّ اِتگ ءُ آئی ءِ سرجمیں ھال شنگ کتگ –

بلوچستان ءِ دمگ قلعہ سیف اللہ مسلم باگ ءَ برجاھیں ایف سی ھیڈکوارٹر ءِ سر ءَ گوستگیں روچ ءَ سلاہ بندیں مردماں اُرش کُتگ ءُ تہ ءَ پُتر اِتگ انت کہ آئی ءَ پد پوج ءَ آپریشن کنان ءَ مروچی شش شش اُرش کارانی کوش ءُ پیراملٹری فورس فرنٹیر کور ھیڈکوارٹر کلئیر کنگ ءِ جار جتگ –

پاکستانی پوج آئی ایس پی آر ءِ نیمگ ءَ شنگ کنگ بوتگیں درشان ءِ تہ ءَ گوشگ بوتگ کہ بلوچستان ءِ دمگ مسلم باگ ءَ اُرشکارانی بگیری ءَ گوستگیں روچ ءَ کلئیرنس آپریشن سرجم کتگ دو دیمی تیرگواری ءَ شش ناشر کار جنگ بوتگ انت –

پوج ءِ جارکش ءِ رِد ءَ کلیئرنس آپریشن ءِ میان ءَ شش پوجی کارمند ءُ یک دمگی مردمے ھم جنگ بوتگ وھدیکہ زالبولے ءَ ھوار شش زدگ بوتگ انت –

دومی نیمگ ءَ پیراملٹری فورس فرنٹیر کور ہیڈکوارٹر ءِ سر ءَ بوتگیں اُرش ءِ زمہ واری تحریک جھاد پاکستان نامی گلے ءَ منّ اِتگ –

تحریک جھاد پاکستان ءِ جارکش ملا محمد قاسم ءَ وتی ٹویٹر ءَ شنگ کرتگیں درشان ءِ تہ ءَ گوشتگ کہ گوستگیں شپ ءَ آئی ءِ گل ءِ پدائی اُرش کاراں بلوچستان ءِ شھر مسلم باگ ءِ پوجی بنجل ءِ سر ءَ شپ ءِ ادار دو ءَ اُرش کُتگ ءُ پدا بنجل وتی دستیگ کتگ –

ملا قاسم ءِ رِد ءَ یک روچے ءُ دو شپاں برجاھیں اُرش ءَ تحریک جھاد پاکستان ءِ مجاھداں اُرش ءَ چِل پوجی کارمند کُشتگ انت ایندگہ زدگ کتگ انت وھدیکہ اُرش ءِ میان ءَ بازیں پوجی ءَ وتی سنگر یل داتگ ءُ تتکگ انت کہ پدا رند ءَ مئے مجاھداں پوجی ہیڈکوارٹر وتی دستیگ کتگ –

جارکش ءَ دیمتر ءَ گوشتگ کہ مجاھدانی بگیری ءِ آپریشن ءَ کور کمانڈر شال ءِ لفٹیننٹ جنرل آصف غفور ءِ سروکی ءَ ایس ایس جی کمانڈوان ھم بھر زرتگ بلے مئے مجاھدانی دیم ءِ داشت نہ کتگ –

گل ءَ مسلم باگ ءَ پوجی ہیڈکوارٹر ءِ سر ءَ اُرش کنوکانی نام ءُ اکس ھم شنگ کتگ انت –

جارکش ملا قاسم ءِ رِ د ءَ اے اُرش ءَ گل ءِ شش مجاھد حمزہ، زکریہ، ابوبکر، مولانہ حنظلہ، مستغفر ءُ اُرش ءِ کماندار ملا معتصم ھوار بوتگ انت –

تحریک جہاد پاکستان ءِ جارکش ملا قاسم ءَ وتی درشان ءِ گڈسر ءَ گوشتگ کہ اُرش تان ھما وھد ءَ برجاہ بنت تانکہ پاکستان ءِ سر ءَ زوریں گدار خائن ٹولہ چی ملک ءَ نہ رکین ایں ءُ اے ملک ءِ تہ ءَ شریعت ءِ عادلانہ نزام آرگ ءَ تاں مئے جنگ برجاہ بیت اِنت –