بلوچستان ءِ دمگ چہ ھُزدار ءَ یک ورنایے پاکستانی پوج ءُ چیریں ادارھانی کارندھاں زورانسری بیگواہ کتگ-
ھُزدار بولان کالونی ءِ جھمنند جاوید بلوچ ء بشیر احمد مروچی سُھب ءِ ساھت دہ ءِ نزیک ءَ آئی ءِ دکان ءَ چہ زورانسری آوار جتگ ءُ بیگواہ کتگ-
کھول رِد ءَ سے گاڑیاں پاکستانی پوج ءُ سادھیں پوشکانی تہ ءِ کارندھاں جاوید آئی ءِ دکان ءَ چہ آوار جتگ ناشناسیں ھندے ءَ برتگ چریشی ءَ پد آئی ءِ درگت ءَ ھچ وڑیں ھال دز نہ کپتگ-
کھول گْوشگ اِنت کہ جاوید بلوچ ایگریکلچر یونیورسٹی فیصل آباد ءَ گریجویشن کتگ وھدے کہ اے میان ءَ آ بلوچ اسٹوڈنٹس کونسل ءِ چئیرمین بیتگ- اے وھد ءَ آ ھُزدار ءَ یک پرائیویٹ وانگجاھے ءَ وانینگ ءَ بیتگ-
دمگی واکداراں اے درگت ءَ ھچ وڑیں درشان دیم ءَ نیتکگ- ھُزدار شھر ءِ کش گوراں چیزے روچانی تہ ءَ ھپت مردم زورانسری بیگواہ کنگ بیتگ اَنت اے درگت ءَ گیشیں ھال آھگ ءَ پش کپتگ اَنت-