آئی پی ایل 2023: ممبئی انڈین ءَ پنجاپ کنگز ءِ دیم ءَ شش وکٹاں گوازی کٹ اِتگ

انڈین پریمئیر لیگ ءِ شانزدھمی سیزن ءِ چِل ءُ ششمی گوازی ءَ ممبئی انڈین ءَ پنجاپ کنگز شش وکٹاں پروش داتگ – ممبئی انڈین ءِ اے سال ءَ نُھ گوازیانی تہ ءَ پنچمی سوب مندی انت وھدیکہ پنجاپ کنگز ءَ دھ گوازیانی تہ ءَ پنچ رند ءَ پروش وارتگ –

دوسد ءُ پانزدہ رنانی ٹارگٹ پروشگ ءَ پہ ممبئی انڈین ءَ ھژدہ اوور ءُ پنچ بالاں چار وکٹانی تاوان ءَ دوسد ءُ شانزدہ رن جوڈ کتگ – اشی ءِ ھمراھی ءَ ممبئی ءَ پنجاپ ءِ دیم ءَ گوستگیں پروش ءِ بیر گپتگ ءُ ھساب برابر کتگ – ممبئی ءِ نیمگ ءَ تلک ورما ءَ دھ بالاں بیست ءُ شش رن جوڈ کتگ ءُ ناٹ آؤٹ بوتگ وھدیکہ ٹیم ڈیوڈ ءَ دھ بالاں نوزدہ رن جوڈ کتگ – پنجاپ ءِ نیمگ ءَ نیتھن ءَ دو وکٹ گپتگ ءُ رشی ءُ ارشدیف ءَ یک یک وکٹ ءِ گپتگ –

ممبئی ءِ روہت شرما اولی اوور ءِ سیمی بال ءَ رشی ءِ اوور ءَ میتھو ءِ دست ءَ کیچ آؤٹ بوتگ اشی ءَ پد کیمرون ءُ ایشان کشن ءَ اسکور پنجاہ ءَ سرکتگ گرین ءَ پنجاہ ءُ چار اسکور ءِ سر ءَ ایشان یل داتگ – گرین ءَ ھژدہ بالاں بیست ءُ سَے رن جوڈ کتگ چدو پد ایشان ءَ سوریا کمار ءِ ھمراھی ءَ جوانیں گوازی پیش داشتگ – سوریہ ءَ وتی نیم سنچری بیست ءُ سَے بالانی تہ ءَ سرجم کتگ وھدیکہ ایشان ءَ بیست ءُ نھ بالاں وتی وتی نیم سنچری سرجم کتگ – سوریہ ءَ شست ءُ شش رن جوڈ کتگ ءُ نیتھن ءِ اوور ءَ ارشدیپ ءَ کیچ کتگ وھدیکہ ایشان ءَ ھپتاد ءُ پنچ رن جوڈ کتگ ءُ ارشدیپ ءِ اوور ءَ رشی ءَ کیچ کتگ – ھردوکاں یکسد ءُ شانزدہ رن ھواری ءَ جوڈ کتگ –

چدوپیسر اولسر بیٹنگ کنان ءَ وکٹ کیپر جیتیش ءُ لیام ءَ جوانی ءَ گوازی کنان ءَ ممبئی انڈین ءِ بگیری ءَ پنجاپ ءِ اسکور سَے وکٹانی تاوان ءَ دوسد ءُ چاردہ ءَ سر کتگ – لیون ءَ اے سیزن ءِ تہ ءَ وتی اولی نیم سنچری سِی ءُ دو بالاں سرجم کتگ ءُ چِل ءُدو بالاں ھشتاد ءُ دو رن جوڈ کتگ ءُ ناٹ آؤٹ بوتگ –

پنجاپ ءِ وکٹ کیپر شرما ءَ بیست ءُ ھپت بالاں چِل ءُ نھ رن جوڈ کتگ ءُ ناٹ آؤٹ بوتگ ھردوکاں پنجاہ ءُ شش بالاں یکسد ءُ نوزدہ رن ھواری ءَ جوڈ کتگ –