ھزدارءُ کوھلوءَ پاکستانی پوج ءِ سرءَ اُرش، یک کارندھے زدگ

بلوچستان ءِ دمگ ھزدار ءُ کوھلو ءَ پاکستانی پوج ءِ جتا جتائیں دابیں اُرشانی نشانگ کنگ بیتگ ھمے وڑ کلات ءَ دگ ءِ جوڑکنوکیں کمپنی ءِ مشینری سوچگ بیتگ اَنت-

دی بلوچستان پوسٹ پتر ھال ءَ سر بیتگیں اھوالانی رد ءَ ھزدار ءِ دمگ وڈھ ءِ ھند مسجد روڈ ءَ پولیس ءَ چوکی ءِ سر ءَ دزبمبے چگل داتگ –

دمگی مردمانی رد ءَ تراک ءَ یک پولیس کارندھے زدگ بیتگ ءُ پد ءَ نادراہ جاہ ءَ سر بیتگ –

دمگی مردمانی تراک ھما وھد ءَ کنگ بیتگ پولیس وتی ڈیوٹی ءِ وھد ءَ بیتگ اَنت- تراک ءَ زدگ بیتگیں پولیس عبدالجبار ءِ نام ءَ زانگ بیتگ ءُ لسبیلہ ءِ جھمنند گوشگ بیتگ –

ھمے رنگ ءَ کوھلو ءِ ھند ٹلینگوخ وڈھ ءِ ھند ءَ سلاہ بندیں پاکستانی پوج ءِ پوسٹ ءِ نشانگ بیتگ-

اُرش ءِ آسر ءَ تاوانانی بارو ءَ واکدارانی نیمگ ءَ ھچ ھال دیم ءَ نیتکگ اَنت-

گوستگیں شپ ءَ کلات ءِ ھند گراڑی ءَ ناشناسیں مردماں کوھی دمگ ءَ بند ساچی دگ ءِ جوڑ کنوکیں کمپنی ءِ بلڈوزر مشین سوچگ بیتگ اَنت –