ھُزدار ءُ پنجگور ءَ دو براتاں ھوار پنچ مردم زورانسری آوار جنگ بیتگ اَنت

بلوچستان ءِ دمگ چہ ھُزدار ءُ پنجگور ءَ پاکستانی پوج ءَ دو براتاں ھوار پنچ مردم زورانسری آوار جنگ ءَ پد ناشناسیں جاھے ءَ برتگ اَنت-

گیشیں ھالانی رِد ءَ ھُزدار ءِ دمگ کوڑاسک دوھلیڑی ءَ گوستگیں سے روچاں چہ لشکر کشی برجاہ ءَ اِنت لشکر کشی ءِ وھد ءَ پوج ءَ دو برات آوار جتگ ءُ بیگواہ کتگ اَنت-

ھُزدار ءَ بیگواہ کنگ بیتگیں بشیر احمد ء تاج محمد سمالانی ءُ آئی ءِ کستریں برات ھوار اَنت-

دمگی اِھوالکارانی رِد ءَ گوستگیں سے روچان چہ پوج ءِ لشکر کشی برجاہ ءَ اِنت کہ دمگ ءَ مزنیں کچے ءَ لَس مردمانی اوشتر ءُ ھر برتگ اَنت ھُزدار ءُ مشکے ءِ کوھی دمگاں پُترتگ اَنت-

تنی وھدے سرکاری واکداراں لشکر کشی ءِ درگت ءَ ھچ وڑیں درشان دیم ءَ نیتکگ-

دومی نیمگ ءَ چہ پنجگور ءَ ھال اِنت کہ گوستگیں شپ ءَ پوج ءَ یک آروسی مراگشے ءَ بیڑبرتگ ءُ سے مردم زورانسری آوار جتگ ءُ گوں وت برتگ اَنت-

بیگواہ بیتگینانی پجّار ضیاء ء نور اللہ، انعام ء اسحاق ءُ ماجد ء عبدالحمید ناماں چہ بیتگ اَنت-