بلوچ لبریشن آرمی ءِ جارکش جیئند بلوچ ءَ رسانکدر ءَ شِنگ کُتگیں درشانے تہ ءَ گُشتگ کہ مئے سرمچاراں نوشکی، پنجگور ءُ مچھ ءَ سئے جتاھیں اُرشانی تہ ءَ زورگیریں پاکستانی پوج ءُ یک رھوتی ٹاورے نشانگ کتُگ، اُرشانی تہ ءَ دژمن ءِ سَے کارندہ مُرتگ ءُ یک رھوتی ٹاورے تباہ بیتگ۔
درشان ءِ تہ ءَ گُشگ بیتگ کہ بی ایل اے ءِ سرمچاراں گوستگیں شپ ءَ نوشکی شھر ءَ بندوکیں اسٹیشن ءِ ھند ءَ بنجاھی شھدگ ءِ سر ءَ بستگیں زورگریں گیریں پاکستانی پوج ءِ بنجل دز بمب اُرش ءِ گون ءَ نشانگ کتگ۔ تراک ءِ آسر ءَ بنجل ءِ ڈن ءَ اوشتوکیں یک کارندھے ھما دمان ءَ مُرتگ وھدیکہ دگہ دو سک ٹپی بیتگ اَنت۔
جارکش ءَ گشتگ کہ اُرش ءَ پد نوشکی پولیس ءَ سرمچارانی راہ ءَ اڑاند جوڑ بیگ ءِ کوشست کُتگ البت سرمچاراں جوانیں شوربندی ءُ رپک کارمرز کنان ءَ سلامتی ءَ وتی جاہ ءَ سر بیتگ اَنت۔
آئی ءَ گُشتگ کہ ما پولیس ءُ لیویز پئیمیں بلوچ گیشتری لشکریاں پد مہ پد گُشتگ کہ آ زورگیریں پاکستانی پوج ءِ گُشگ ءِ پد ءَ بلوچ جُنز ءِ دیم ءَ اڑاند بئیگ ءَ چہ پھریز بہ کن اَنت، ءُ لس مھلوک ءِ کم شرپ کنگ ءَ بند بہ کن اَنت اگاں نہ آ ھم نشانگ کنگ بنت اِنت۔
جیئند بلوچ ءَ گُشتگ کہ دگہ یک اُرشے سرمچاراں پنجگور ءِ ھنکین وشبود ءَ کسٹم ءِ نزیک ءَ زورگیریں پاکستانی پوج ءِ کاروان ءَ ھواریں یک گاڑی یے آئی ای ڈی ءِ اُرش ءَ نشانگ کُتگ۔
آئی ءَ دیمتر ءَ گُشتگ کہ تراک ءَ زد ءَ اتکگیں کم چہ کم دو کارندہ مُرتگ اَنت ءُ سئے ٹپی بیتگ اَنت وھدیکہ آیانی گاڑی تباہ بیتگ۔
درشان ءِ تہ ءَ گُشگ بیتگ کہ بی ایل اے ءِ سرمچاراں سئمی ارش بولان ءِ ھند مچھ ءَ کُتگ کہ اود ءَ بی بی نانی ءِ ھند ءَ یوفون شرکت ءِ یک رھوتی ٹاور ءِ مشینری مانداشتگ ءُ بیکار کُتگ۔
گُڈسر ءَ جیئند بلوچ ءَ گُشتگ کہ اے اُرشانی زمہ واری ءَ بلوچ لبریشن آرمی من ایت۔ مکسد ءِ گرگ ءَ داں زورگیریں پوج ءُ آئی ھمکارانی سر ءَ مئے اُرش برجاہ مان اَنت۔