بلوچستان ءِ دمگ نوشکی ءَ پاکستانی لشکریانی سرءَ دز بمب اُرش کنگ بیتگ وھدیکہ پنجگور ءَ پاکستانی لشکر ءِ گاڑی ءِ سرءَ بمب تراک ءِ بیتگ۔
سر بیتگیں ھالانی رِدءَ بلوچستان ءِ دمگ نوشکی ءَ پاکستانی لشکریانی سرءَ دز بمب اُرش کنگ بیتگ کہ اشی آسرءَ دو کارندہ ٹپی بیتگ اَنت۔
واکدارانی ردءَ یک شمبے ءُ دو شمبے ءِ نیامی شپ ءَ شال تفتان دگ اسٹیشن ءِ ھندءَ برجاھیں ایف سی ءِ چیک پوسٹ ءِ سرءَ ناشناسیں پرپٹ سواریں مردماں دز بمباں گوں اُرش کُتگ۔
واکداراں گُشتگ دز بمب ترندیں تراکے ءَ گوں تراکیتگ کہ چریشی ءَ دو ایف سی کارندہ سک ٹپی بیتگ اَنت وھدیکہ اُرشکار تچگ ءَ سوبمند بیتگ اَنت۔
چدو پیسر گوستگیں شپ ءَ بولان، مچھ ءَ ناشناسیں مردماں موبائل شرکت ءِ یک ٹاورءِ مشینری مانداشتگ اَنت ءُ بیکار کتُگ اَنت۔
دومی نیمگ ءَ بلوچستان ءِ دمگ پنجگور ءَ گوستگیں شپءَ ناشناسیں مردماں پاکستانی لشکریانی کاروان ءَ ھواریں گاڑی بمب اُرش ئے ءَ نشانگ کُتگ۔
ھندی اھوالانی ردءَ گوستگیں شپ ءَ وشبود ءِ ھند ءَ کسٹم ءِ نزیک ءَ لشکری نشانگ کنگ بیتگ اَنت، اُرش ءِ آسر ءَ لشکریاں تاوان چست کنگ ءِ اھوال اَنت۔
اھوالکارانی گیشتر گُشگ اِنت کہ اُرش ءَ پد ھمے دمگاں گوستگیں شپ ءَ ترندیں تیر گواری ءِ توار اِش کُنگ بیتگ وھدیکہ مروچی سھب ءَ لشکریاں مزنیں کچے ءَ ھنکین انگر کُتگ ءُ منانک یکجاہ کنگ بندات کُتگ۔
ھندی اھوالانی ردءَ پاکستانی لشکریاں سوردو ءِ بازار ءَ چہ سئے مردم زورانسری بیگواہ کُتگ اَنت البت اے درگت ءَ گیشتر اھوال انگت سر نہ بیتگ اَنت۔