آئی پی ایل ءِ ھزارمی گوازی ممبئی انڈین ءُ راجستھان رائل ءِ میان ءَ بوتگ کہ ممبئی ءَ شش وکٹاں کٹ اِتگ

آئی پی ایل 2023: ممبئی انڈین ءَ آئی پی ایل ءِ ھزارمی گوازی راجستھان رائل پروش داتگ ءُ اے سیزن ءِ سوبمندی ءِ چوکا جتگ – راجستھان رائل نیمگ ءَ دیگ بوتگیں دوسد ءُ سینزدہ رنانی ٹارگٹ ممبئی انڈین ءَ پروشتگ ءُ گوازی وتی نام ءَ کتگ ممبئی ءَ اے گوازی شش وکٹاں کٹ اِتگ – اے گوازی ءَ ٹم ڈیوڈ ءَ گڈی اوور ءَ پد ماں پد چوکا ءُ چکائے پُشت ءَ چکا کُتگ ءُ وتی ٹیم کٹارین اِتگ – ڈیوڈ ءَ چاردہ بالاں چِل ءُ پنچ رن جوڑ کتگ ءُ ناٹ آؤٹ بوتگ –

دوسد ءُ سینزدہ رنانی ٹارگٹ ءِ پروشگ ءَ پہ ممبئی ءِ بندات جوان نہ بوتگ – ممبئی ءِ اسکور چاردہ بوتگ انت کہ روہت شرما ءِ وکٹ کپتگ – روہت ءَ سَے رن جوڑ کتگ بوتگ کہ سندیپ شرما ءَ بولڈ کتگ – وکٹ کیپر ایشان ءَ لھتے شوکیں شاٹ جتگ بلے آئی ءَ ھم بیست ءُ ھشت رن جوڑ کتگ ءُ آؤٹ بوتگ – ایشان ءَ بیست ءُ سے بالاں بیست ءُ ھشت رن جوڑ کتگ ءُ کیمرون ءَ بیست ءُ شش بالاں چِل ءُ چار رن جوڑ کتگ ءُ واتر بوتگ –

چدوپیسر یشسوی جیسوال ءِ اولی سنچری ءِ کنگ ءَ راجستھان ءَ ھپت وکٹاں دوسد ءُ دوازہ رن جوڑ کتگ – جیسوال ءَ شست ءُ دو بالاں شانزدہ چوکا ءُ ھشت چکا جتگ ءُ یکسد ءُ بیست ءُ چار رن جوڑ کتگ ءُ ممبئی بگیری ءَ اے سیزن ءِ تہ ءَ سیمی رند ءَ دوسد ءَ گیش رن جوڑ کتگ –

جیسوال ءَ اے سیزن ءِ تہ ءَ چارسد ءَ گیش رن جوڑ کتگ ءُ آئی ءِ اے سیزن ءِ تہ ءَ درساں گیشتریں وتی جند ءِ سکور ءِ ھم جوڑ کتگ – آئی ءَ بالر ریلی میریڈیتھ الکاپ ءَ ششتگ چہ آئی ءَ چار اووراں پنجاہ ءُ یک رن گپتگ –