شال: زورانسری آوار جنگ بوتگیں مردم آمیدگس ءَ آرگ بہ بنت – وکیل

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل مروچی 5 ھزار ءُ بیست ءُ نھمی روچ ءَ ھم برجاہ بوتگ –

مروچی پاکستان بار کونسل ءِ کمک سرکماش ہارون رشید، حسن رضا پاشا، کمک سرکماش پنجاپ بار کونسل ءِ بشارت اللہ خان، بلوچستان بار کونسل ءِ کاسم علی گاجی زئی ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ وکیلاں گوشتگ کہ بیگواھیں مردمانی ھاتر ءَ توار چست کتگ ءُ زیک ھمے درگت ءَ قراداد ءِ پیش کنگ بوتگ کہ زورانسری آوار جنگ بوتگیں مردم یل کنگ بہ بنت –

آھانی گوشگ ات کہ ھستیں وھد ءِ سرکار بیگواھیں مردماں آمیدگس ءَ پیش بہ کنت اگاں آ بے کسور انت گڈا وتی مردمانی دست ءَ دیگ بہ بنت –

ھمے وھد ءَ ماما قدیر بلوچ ءَ گوشتگ کہ زورانسری آوار جنگ بوتگیں مردماں دروگیں میڑاں جنگ بوگ ءَ انت ءُ آھانی جون کھول ءِ دست دیگ بوگ ءَ نہ انت –

آئی ءِ گوشگ ات کہ سوبائی سرکار ءُ آئی ءِ ٹولی سرکار ءِ وپاداری ھچ وڈیں کسر یل دیگ ءَ نہ انت -زورانسری آوار جنگ بوتگیں پرزند شھید کنگ ءُ یکجاھیں کبراں چگل دیگ بوگ انت – وتی وپاداری ءِ انسانیت ءِ کوش ءَ برزیں جاھے ءَ سرکنگ ءِ ھاتر ءَ بلوچانی چک چینی ءُ زورانسری آوار جنگ بوتگیں مردمانی گِسانی سرا بمبگواری ءِ ھچ وڈیں موہ یل دیگ ءَ نہ انت –