روکپتی بلوچستان: گوستگیں بیست ءُ چار ادارانی تہ ءَ چار کس پاھو دیگ بیتگ اَنت

روکپتی بلوچستان ءَ بندوکیں بندیگانی پاھو دیگ بیتگیں مردمانی کَچ چار ءَ سر بیتگ اَنت- گوستگیں بیست ءُ چار ادارانی توک ءَ روکپتی بلوچستان ءِ بنجاھی شھر زاھدان ءُ ایرانشھر ءَ بندیگین چار مردم پاھو دیگ بیتگ اَنت-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءَ ایرانی آمیدگس ءِ پرمان ءَ یک دگہ مردمے پاھو دیگ بیتگ –

پاھو دیگ بیتگیں مردم ءِ پجار عبدالستار شاھوزئی ء اکبر جھمنند زاھدان ءِ نام ءَ زانگ بیتگ کہ آ ایرانی سال سیزدہ سد ءُ نُود ءُ نُھ ءَ کوش ءِ بھتام ءَ گرگ بیتگ –

ھمے وڑ ءَ روکپتی بلوچستان ءِ دمگ ایرانشھر ءَ ایرانی آمیدگس ءِ پرمان ءَ یک بندیگے پاھو دیگ بیتگ-

پاھو دیگ بیتگیں مردم ءِ پجار عید مھمد شادمان ء جمعہ جھمنند جلگہ ایرانشھر ءِ نام ءَ زانگ بیتگ –

زانگ بہ بیت گوستگیں روچ ءَ ایرانشھر ءَ مھمود رھمانی نامیں بندیگے ھم پاھو دیگ بیتگ ءُ ھمے وڑ ءَ زاھدان ءَ بندیگین نعمت اللہ ریگی نامیں مردمے ھم پاھو دیگ بیتگ-

روکپتی بلوچستان ءَ مردمانی پاھو دیگ گیشتر نشہ باپاری، کوش ءُ دگہ دگہ وئیلانی پشدر ءَ بوگ ءَ اَنت ءُ دومی نیمگ ءَ ایرانی آمیدگسانی سر ءَ انسانی ھکانی گل ءُ سیاسی مردم یکشل ءَ ایراد گرگ ءَ اَنت-