پھرہ: ایرانی آمیدگس ءِ ھکم ءَ یک بندیگے پاھو دیگ بیتگ

روکپتی بلوچستان ءِ دمگ پھرہ ’ایرانشھر ‘ ءَ یک بندیگیں مردمے پاھو دیگ بیتگ –

گیشیں ھالانی مروچی سھب ءَ ایرانی آمیدگس ءِ ھکم ءَ یک بندیگیں مردمے ماں ایرانشھر ءَ پاھو دیگ بیتگ-

پاھو دیگ بیتگیں مردم ءِ پجار محمود رحمانی ء رائیس جھمنند خیر آباد نایگون ایرانشھر ءِ نام ءَ زانگ بیتگ-

ھالانی رد ءَ اے دوازدہ سال ءَ پیش ماں کوش ءِ بھتام ءَ گرگ بیتگ ءُ لھتے روچ ءَ پیش ایرانی آمیدگس ءَ پاھو ءِ ھکم داتگ ءُ مروچی آ ایرانشھر ءِ زندان ءَ ہاھو دیگ بیتگ-

اھوالانی تہ ءَ گوشگ بیتگ کہ محمود ءِ کھول گوستگیں روچ ءَ ھال دیگ بیتگ ءُ آئی ءِ کھول ءَ گوستگیں روچ ءَ گڈی گِندوک کتگ –

ھمے وڑ ءَ پنچ روچ ءَ پیش روکپتی بلوچستان ءِ بنجاھی شھر زاھدان ءَ ھم یک بندیگے پاھو دیگ ءِ واستا جتائیں کوٹی ءَ برگ بیتگ ءُ مروچی آ واتر پد ءَ جیل ءَ روان دیگ بیتگ –

اے بندیگ ءِ نام اسماعیل ءِ نام ءَ زانگ بیتگ آ کوش ءِ بھتام ءَ گرگ بیتگ-

آئی ءِ کھول ءِ گوشگ اِنت اسماعیل ءِ سر ءَ ایرانی آمیدگس ءَ بے بنیں بھتام جتگ ءُ آمیدگس ءَ داں انگت ءَ آئی ءِ سر ءَ پاھو دیگ ءِ مھکمیں منانک آورت کت نہ کتگ اَنت ایشی ءَ ابید آمیدگس ءَ پاھو ءِ ھکم داتگ ءُ پد ءَ دوبر واتر جیل ءَ روان دیگ بیتگ-