خدابخش بزدار ءِ کتاب “بلوچی بتل ” اقبال زھیر ءِ رجانک “بیا قصہ جناں” چاپ ءُ شنگ بوتگ انت

بلوچی اکیڈمی کوئٹہ ءِ نیمگ ءَ خدا بخش بزدار ءِ کتاب “بلوچی بتل” ءُ اقبال زھیر بلوچ ءِ رجانک کرتگیں ادریس شاہ ءِ کسہ ماں بلوچی ءَ”بیا قصہ جناں” چاپ ءُ شنگ بوتگ انت – بلوچی بتل ءِ تہ ءَ بلوچی ضرب الامثال ءُ محاور آں ھوار آیانی اردو رجانک ھم ھوار انت – وھدیکہ اوگان ءِ نبشتہ کار ادریس شاہ ءِ یانزدہ کسہ اقبال زھیر بلوچ ءَ ماں بلوچی ءِ تہ رجینتگ انت –

بلوچی اکیڈمی نیمگ ءَ چاپ ءُ شنگ بوتگیں کتاب ءِ درگت ءَ خدابخش بزدار ءَ وتی کتاب سرتاک ءَ نبشتگ کہ بلوچی چوش کہ سک باز کوھنیں زبان ءِ بلے آئی ءِ گور ءَ نبشتگی مواد ءِ سک باز کمی انت گڈا من ھمے مار اِتگ کہ بلوچی ضرب الامثال ءُ محاورہ یکجاہ کنگ ءُ کتابی دروشم ءِ دیگ بہ بنت نودربر ءُ وانوکاں سر کنگ بہ بنت کہ اے یک المی ءُ لوک ورثہ ءِ پھریزگ ءِ جھدے –

آئی ءَ دیمتر ءَ نبشتگ کہ اے درگت ءَ بلوچی ضرب المثل ءِ میر غلام قادر نوشروانی کتاب ھم چاپ شنگ بوتگ آئی ءِ تہ ءَ بازیں چیز ھست انت بلے گوریچانی رودراتکی بلوچستان ءُ ڈیرہ غازی خان ءِ بلوچی گپ جنوکیں مردمانی ھاتر ءَ مروج امثال کم انت من جھد کتگ کہ اے دمگانی مروج امثال ھم ھوار کنگ بہ بنت – اے کتاب ھر تکاں سیادی داروکیں بلوچانی ھاتر ءَ سودمند بیت اِنت –

بلوچی اکیڈمی ءِ نیمگ ءَ چاپ ءُ شنگ بوتگیں دومی کتاب اوگان ءِ نبشتہ کار ءُ زانتکار ادریس شاہ ءِ یانزدہ کسہ انت کہ آ اقبال زھیر بلوچ ءَ ماں بلوچی ءِ تہ ءَ رجینتگ انت –

اقبال زھیر بلوچ ءَ وتی رجانک کتگیں کتاب بیا قصہ جناں ءِ سرتاک ءَ نبشتگ کہ اے یانزدھیں کسہ اوگان ءِ نبشتہ کار ءُ زانتکار ادریس شاہ ءِ سِی سالی جھدانی برورد انت کہ آئی ءَ پہ گونڈواں پولیتگ ءُ نبشتہ کتگ انت –

آئی ءَ دیمتر ءَ نبشتگ کہ اے رنگیں ھندی ءُ دودربیدگی کسہ آئی چہ میانی ایشیا ءُ میان رودرآتک ءِ زبانانی نبشتھی پُتنکاں چِتگ ءُ نز آؤرتگ انت – ءُ اے کسہ ءَ انگریزی ءِ تہ ءَ ھم رجینگ بوتگ انت –