کلات ءَ دُژمن ءِ چاریگ ءَ ھوار پاکستانی پوج ءِ دو کارندھانی کوش ءِ زمہ واری بی ایل اے ءَ منّ اِتگ اَنت

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں کلات ءِ دو جتائیں اُرشاں یک چاریگے ءَ ھوار زورگریں پاکستانی پوج ءِ دو کارندہ کُشتگ –

آئی ءَ گْوشتگ کہ بی ایل اے ءِ سرمچاراں دو روچ ءَ ساری کلات ءَ شور پارود ءِ نزیکیں دمگ دشت گوران ءَ زورگریں پاکستانی پوج ءُ چیریں ادارھانی جوڑ کتگیں ڈیتھ اسکواڈ ءِ ھاسیں کارندہ زمان خان ءِ سر ءَ پیسر ءَ بستگ ءُ اُرش کتگ چریشی ءِ آسر ءَ آ ھما دمان ءَ مرتگ-

جیئند بلوچ ءَ گْوشتگ کہ زمان خان گوستگیں بلاھیں مدتے ءَ چہ شورپارود ءَ دُژمنیں پوج ءِ ھاتر ءَ چاریگے دروشم ءَ پُرکار بیتگ- مئی 2019 ءَ شورپارود ءَ بی ایل اے ءِ سنگتاں ماما شمس پرکانی بلوچ ، ڈاکٹر شعیب بلوچ ءُ سنگتیں گل بی ایل ایف ءِ باسک ظفر محمد حسنی وھدے کہ مئی 2020 ءَ بی ایل اے ءِ سرمچار شھداد بلوچ ءُ احسان بلوچ ءِ شھیدی ءَ پاکستانی پوج ءُ ڈیتھ اسکواڈ ءِ ھمراھی ءَ تچکی ءَ گون بیتگ-

جارکش ءَ گْوشتگ کہ اشی ءَ اَبید اے کارندہ شور پارود ءَ بلوچ جُھدکارانی راہ ءُ درانی پیشدارگ، ڈیتھ اسکواڈ کارندھاں اوتاک دیگ ءَ ھمگرنچ بیتگ-

درشان ءِ تہ ءَ گْوشگ بیتگ کہ راجی گداری جرم ءِ سر ءَ زمان خان سرمچاراں وتی انجام ءَ رسینتگ وھدے کہ اے ٹولی ءَ چہ سیادی داروک ھم زمان خان ءِ وڑ ءَ سزا دیگ بنت-

جارکش ءَ گْوشتگ بلوچ لبریشن آرمی ءِ سرمچاراں کلات شھر ءَ دگہ یک اُرشے ءَ زورگریں پاکستانی پوج ءِ بُنجاھی بُنجل ءِ پھازوکی چوکی گوستگیں شپ ءَ نشانگ کتگ-

آئی ءَ دیمتر ءَ گْوشتگ کہ سرمچاراں گرنیڈ لانچر ءُ دگہ وتکاریں سلاھاں چہ دُژمنیں کارندہ ھما وھد ءَ نشانگ کتگ اَنت وھدے چوکی سر ءَ پنچ کارندہ یکجاہ بیتگ اَنت، اُرش ءِ آسر ءَ کم چہ کم دو دُژمنیں کارندہ ھما دمان ءَ مرتگ اَنت وھدے کہ دگہ ٹپی بیتگ اَنت-

جارکش ءَ گُڈی ءَ گْوشتگ کہ بلوچ لبریشن آرمی اے دوئیں اُرشانی زمہ واری ءَ منّ اِیت ءُ اے اھد کنت وتی مول مراداں تاں زورگریں پوج ءُ آئی ءِ ھمکارانی سر ءَ مئے اُرش برجاہ بنت-