زاھدان ءَ فنوج ءُ زاھدان ءَ ایرانی لشکر ءِ دست ءَ کُشگ بیتگیں مردمانی انساپ ءِ ھاتر ءَ زھرشانی
روکپتی بلوچستان ءِ بنجاھی شھر زاھدان ءَ آدینگ ءِ نماز ءَ پد مردماں زھرشانی روانک کش اتگ-
روانک ءَ بازیں کچے ءَ مردماں بھر زرتگ ءُ اوگام جنان ءَ فنوج ءَ ھوار زاھدان ءُ دگہ جاھاں کُشگ بیتگیں مردمانی کوشانی بگیری ءَ زھرشانی روانک کش اتگ، روانک ءَ بندیگین مردمانی یل کنگ ءُ کُشتگیں مردمانی انساپ ءِ لوٹ کنگ بیتگ اَنت-
روانک مکی مسیت ءَ نماز ءَ پد بندات بیتگ ءُ شھر ءَ پندی دروشم ءَ تران بیتگ ءُ آیاں گوشتگ کہ ھمک انسان ءِ کوش ءِ ھساب ھست اَنت باید کُشتگیں بلوچانی گون ءَ انساپ بہ کنت-
ھمے وڑ ءَ زاھدان ءِ مکی مسیت ءِ پیش امام ءُ سنی کمیونٹی ءِ سروک مولانا عبدالحمید بلوچ ءَ تران کنان ءَ گوشتگ کہ سرکاری تپنگدار باید مردمانی دیماں تپنگاں تچک مہ کن اَنت پرچاکہ ھچ زورانسری سرکار پشت نہ کپ ایت-
آئی ءَ گوشتگ کہ پہ زاھدان ءَ کُشگ بیتگیں مردماں کس انساپ کنگ ءَ نہ اِنت بلے سرکار گوشگ اِنت زانگ بوگ ءَ نہ اِنت تپنگدار ءَ توپگ جتگ ءُ مردم کُشتگ اَنت-
زانگ بہ بیت گوستگیں ھپتگ ءَ روکپتی بلوچستان ءَ یک پرپٹے ءِ سر ءَ ایرانی پولیس ءَ گاڑی چاڑینتگ ءُ چریشی ءَ سَے کس زدگ ءُ یکے بیران بیتگ ات ءُ پد ءَ مردماں زھرشانی کتگ ءُ اود ءَ دوبر پولیس ءَ مردمانی شنگ ءُ شانگ کنگ ءَ تیرگواری کتگ ءُ مردم زدگ کتگ اَنت-