مشکے اُرش ءَ ریاستی چاریگ ءِ ٹپی کنگ ءِ زمہ واری بی ایل ایف ءَ منّ اِتگ

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست ھپت اپریل ءَ مشکے ءِ دمگ النگی ءَ ریاستی چاریگ بشیت پنّام ءِ ٹلو ء عثمان سر ءَ تیرگواری کتگ چریشی ءَ چہ آ ٹپی بیتگ- آ مشکے ءِ جتاجتائیں زُنگ ، راحت، کوہ اسپیت ءُ واشک راگے زوراکی ءَ پاکستانی پوج ءِ ھمراہ بیتگ-

آئی ءَ گْوشتگ کہ بشیر پنّام ٹلو ءَ 2013 ءَ بلوچستان ءِ سلاہ بندیں جُھد ءَ ھمگرنچ بیتگ بلے 2015 ءَ آ پاکستانی پوج ءِ دیم ءَ سرنڈر بیتگ ءُ آیانی ھاتر ءَ چاریگی ءُ ھال دیگ ءِ کار کُتگ ئِے – مروچی سُھب وھدے آ پرپٹ ءِ سر ءَ روگ ءَ بیتگ اَنت کہ آ سرمچاراں تیرگواری ءَ چہ ٹپی بیتگ ءُ وتی تُپنگ ءُ پرپٹ یل داتگ ءُ میتگ نیمگ ءَ تتکگ – سرمچاراں آئی ءِ تُپنگ دستیگ کتگ-

جارکش ءَ گْوشتگ کہ پاکستانی پوج ءَ دمگ ءَ یک سلاہ بندیں ڈیتھ اسکواڈے جوڑ کتگ- بشیر ٹلو آئی ءِ بھر بیتگ- اشی ءَ بازیں مردمے زورگ ءَ اِنت مشکے کالج ءَ نادارینگ ءُ آسراتی داتگ- اے کالج ءِ ماڑی دہ سالاں چہ پاکستانی پوج ءِ دستیگ بیتگ کہ چیزے ماہ ءَ ساری یل کتگ ءُ ڈیتھ اسکواڈ ءِ دست ءَ داتگ- اے چاریگاں ماھے پانزدہ کلدار دیگ ءَ اَنت تانکہ آ دمگ ءَ زوراکی ، دُزی ءَ مردماں تنگ کنگ ءِ دْرچ ءَ برجاہ بدار اَنت-

جارکش ءَ گْوشتگ کہ اے وڑیں سرجمیں بلوچاں مکن کن ایں کہ آ دُژمن ءِ پندل، بیھار ءُ لب ءُ لالچ ءِ ھاتر ءَ راجی جُھد ءِ بگیری ءَ ریاست ءِ کمکاری ءَ پھریز بکن اَنت-