چین وتی گچینی باسک یوکرین ءَ جنگ بندی ءِ واستا دیم دنت – چینی سروک

چین ءُ یوکرین ءِ سروک ءِ میان ءَ رھوتی اھوال بیتگ اَنت ءُ بیجنگ جنگ بندی ءِ واستا جد ءُ جھد کنت اِنت-

ھال سر کنوکیں ادارہ روئٹرز ءَ چینی رسانکدر ءِ درور دیان ءَ گوشتگ چار شمبے ءِ روچ ءَ روک شی جن پنگ ءُ یوکرین ءِ سروک ولاد دینیر زیلنسکی ءِ گون ءَ رھوتی اھوال بیتگ اَنت-

چینی سروک ءَ گوشتگ آیانی نمائندگ ناوشی ءِ گیش ءُ گیواری ءَ ھردوکیں نیمگاں گپ ءُ تران کنت اِنت-

سروک شی جن پنگ ءَ یوکرین ءِ سروک ءَ گوشتگ چین ایمنی ءِ گپ ءُ تران ءَ دیم ءَ بارت اِنت ءُ زوت جنگ بندی ءِ جد ءُ جھد ءَ بندات کنت-

اپریل ءِ بندات ءَ سروک شی جنگ پنگ ءَ گوشتگ آ سروک ولاددیمیر زیلنسکی ءِ گون ءَ گپ ءُ تران ءَ جاڑیگ اِنت-

ھمے وڑ ولاد دیمیر زیلنسکی ءَ بازیں براں ھم چین سروک ءِ گون ءَ گند ءُ نند ءَ گوشتگ بیتگ-

سروک زیلنسکی ءَ چینی سروک ءِ تر ءُ تاب ماں ماسکو ءَ پد ھم آئی ءَ گند ءُ نند ءِ گوشتگ ات-

روس ءِ نیمگ ءَ یوکرین ءِ سر ءَ اُرش ءَ سروک شی جن پنگ ءُ یوکرین سروک ولادیمیر زیلنسکی ءِ میان ءَ اے اولی رھوتی اھوال اِنت-

یوکرین ءِ سروک ءَ اے دراج کشیں گپ ءُ تران ءَ یک اُمیتدارے گوشتگ-