بلوچستان : جتاجتائیں وئیلانی آسر ءَ سے مردم بیران ھپت ٹپی بیتگ اَنت

بلوچستان ءِ جتاجتائیں دمگاں تیرگواری، بمب تراک ءُ دگ ءِ وئیلانی آسر ءَ دو مردم بیران ھپت ٹپی بیتگ اَنت-

گیشیں ھالانی رِد ءَ کیچ ءِ بُنجاھی شھر تربت ءَ اللہ والی مارکیٹ ءَ ناشناسیں پرپٹ سواریں سلاہ بندیں مردمانی تیرگواری ءَ چہ ارشد نظیر جھمنند پنجاب خانیوال بیران بیتگ-

ھالانی رِد ءَ کُشگ بیتگیں مرد ایم آئی کارندھے –

ھمے وڑ کلات ءِ دمگ دشت گوران ءَ گوستگیں شپ ءَ ناشناسیں سلاہ بندیں مردمانی تیرگواری ءَ چہ زمان خان ساسولی نامیں مردمے بیران بیتگ-

اے مرد ءِ درگت ءَ گْوشگ بوگ ءَ اِنت آئی ءِ سیادی گوں سرکاری پلامرزی کنوکیں ٹولی ءَ اِنت-

دگہ یک وئیلے سبی ءِ دمگ ناڑی گاج دگ ءَ ناشناسیں مردمانی نیمگ ءَ چہ چیرکتگیں شورانی ترکگ ءِ آسر ءَ گاڑی ءَ سوار دو مردم محمد حسن ءُ مجید ٹپی بیتگ اَنت وھدے کہ تراک ءِ آسر ءَ گاڑی ءِ دیم بھر سرجم ءَ تباہ بوتگ-

وئیل ھال سر بوگ ءَ دمگی انتزامیہ ھم دمان ءَ سر بیتگ اَنت دمگ انگر ءَ کتگ ءُ ٹپی نادُراھجاہ برتگ اَنت گیشیں پٹ پول سبی انتزامیہ کنگ ءَ اِنت-

زانگ بہ بیت اے وڑیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں زرتگ اَنت بلے اُرش زمہ واری انگت ھچ گل ءَ نہ زرتگ-

دومی نیمگ ءَ ڈیرہ مراد جمالی ءِ دمگ منجھو شوری پولیس تھانہ نزیک ءَ باری شاک ھند ءَ یک کسانیں گپے ءِ سر ءَ نیچاری ءُ ڈومکی ٹکانی دو ٹولیانی میان ءَ جنگ ءُ چوپ ءِ وھد ءَ تیرگواری کنگ بیتگ ءُ تیرگواری ءِ آسر ءَ بادل ڈومکی بیران وھدے کہ زاھد علی ءَ نور خاتون سک ٹپی بیتگ اَنت ءُ کُتکار ھما دمان ءَ تتکگ-

ھمے وڑ پنجگور ءَ تیرگواری ءِ رِد ءَ ایس پی ءَ ھوار دو کارندہ ٹپی بیتگ اَنت وھدے کہ سے کُتکار دزگیر کنگ بیتگ اَنت-

مستونگ ءِ تھسیل کھڈ کوچہ ءَ تُرند رؤکیں پرپٹ سوار حفیظ اللہ ءُ سید عبداللہ شاہ جھمنند شال کُچک ءِ ڈِک ورگ ءَ ٹپی بیتگ – ھمے گوشگ بوگ ءَ اِنت کہ آ ھُزدار ءَ چہ شال ءَ آھگ ءَ بیتگ –