آئی پی ایل ءِ سِی ءُ پنچمی گوازی ءَ گجرات ءَ ممبئی انڈینز ءِ دیم ءَ پنجاہ ءُ پنچ رناں گوازی کٹ اِتگ – ہاردک پانڈیا ءِ سروکی ءَ گجرات ءَ اولسر ءَ بیٹنگ کنان ءَ بیست اوورانی تہ ءَ شش وکٹانی تاوان ءَ دو سد ءُ ھپت رن جوڈ کتگ وھدیکہ ممبئی ءَ بیست اووراں نپھ وکٹانی تاوان ءَ بس یکسد ءُ پنجاہ ءَ دو رن جوڑ کت کتگ – ممبئی ءَ یانزدہ اووراں پنچ وکٹانی تاوان ءَ پنجاہ ءُ دو رن جوڑ کتگ کہ پدا رند ءَ پہ آھاں رنانی سرجم کنگ گران ءَ کپتگ ءُ گوازی ءِ کٹگ ءَ بے سوب بوتگ انت – ممبئی ءِ اے چارمی بے سوبی انت –
دو سد ءُ ھشت رنانی ٹارگٹ ءِ پروشگ ءَ پہ ممبئی ءِ بندات شر نہ بوتگ ، کپٹن رویت شرما ءَ دو ایشان ءَ سینزدہ، کیمرون ءَ سِی ءُ سَے رن جوڑ کتگ ءُ آؤٹ بوتگ انت – ممبئی ءَ پنجاہ ءُ نُھ رن جوڑ کتگ ءُ آئی ءِ پنچ وکٹ کپتگ انت – راشد خان ءُ نور احمد ءَ یکیں اوور ءَ دو دو وکٹ گپتگ ءُ ممبئی سرین پروش کتگ راشد ءُ نور احمد ءَ ھشت اووراں شست ءُ چار رن داتگ ءُ پنچ وکٹ گپتگ بزانکہ اوگان ءِ اے دوئیں بالراں ممبئی ٹیم ءِ نیم واتر دیم داتگ –
سوریہ جوڈ بوتگ بلے آئی ءَ ھم دوزادہ بالاں بیست ءُ سَے رناں گیشتر جوڑ کت نہ کتگ چریشی ءَ پد نھال ءَ بیست ءُ یک بالاں چِل رن جوڑ کتگ بلے آئی ءَ ھم ممبئی بے سوبی ءَ رکینت نہ کُتگ –
چدوپیسر ممبئی ءَ ٹاس کٹ اِتگ ءُ اولسر ءَ بالنگ کنگ ءِ شور کتگ – ارجن ءَ ھما زوتاں ممبئی ءِ نیمگ ءَ اولی سوبمندی رستگ کہ آئی ءَ ردھیمان ایشان ءِ دست ءَ کیچ کنائینتگ ءُ پدا رند ءَ ہاردک پانڈیا ءَ ھم سینزدہ رن جوڑ کتگ ءُ آؤٹ بوتگ بلے پدا ھم شبھمن ءَ وت ءَ داشتگ ءُ وتی نیم سنچری کتگ شبھمن ءَ پنجاہ ءُ شش رن جوڑ کتگ ءُ آؤٹ بوتگ کہ اے وھدی گجرات دوازدہ اووراں سَے وکٹانی تاوان ءَ نود ءُ نھ رن بوتگ انت بلے گڈی ھشتیں اووراں گجرات ءَ یکسد ءُ ھشت رن جوڑ کتگ –
گجرات ءِ نیمگ ءَ ڈیوڈ ءُ ابھینو ءَ جوانین گوازی پیش داشتگ – ڈیوڈ ءَ آوٹ بوگ ءَ پیسر بیست ءُ دو بالاں چِل ءُ شش رن جوڑ کتگ ءُ منوھر ءَ بیست ءُ یک بالاں چِل ءُ دو رن جوڑ کتگ انت – ھردوکاں سِی ءُ پنچ بالاں ھپتاد ءُ یک رن ھواری ءَ جوڑ کتگ – گڈسر ءَ راھل تیوتیا ءَ ھم جوانیں گوازی پیش داشتگ کہ آئی ءَ بس پنچ بالاں سَے چکا جتگ ءُ بیست رن جوڑ کتگ – ھمے وڑ گجرات ءَ بیست اووراں دوسد ءُ ھپت رن جوڑ کتگ –