زاھدان: پھزدارانی کوش ءِ بھتام ءَ بندیگیں جتائیں کوٹی ءَ پہ پاھو برگ بیتگ

روکپتی بلوچستان ءِ بنجاھی شھر زاھدان ءَ ایرانی آمیدگس ءِ پرمان ءَ یک بندیگیں بلوچے کوش ءِ بھتام ءَ جتائیں کوٹی ءَ پہ پاھو ءَ برگ بیتگ-

ھالانی رد ءَ گوستگیں روچ ءَ ایرانی آمیدگس ءَ پرمان دیان ءَ یک بندیگیں مردمے زاھدان ءِ مزنیں زندان ءَ جتائیں کوٹی ءَ پہ پاھو دیگ ءَ برگ بیتگ –

بندیگ ءِ پجار اسماعیل شاہ بخش ء غلام نبی جھمنند زاھدان ءِ نام ءَ زانگ بیتگ-

شنگ بیتگیں رپورٹ ءِ تہ ءَ گوشگ بیتگ اسماعیل ایرانی سال 21 اردیبھشت 1399 بزانکہ مروچی چہ چار سال ساری پھزدارانی کوش ءِ بھتام ءَ گرگ بیتگ بلے آئی ءَ اے کوش یکشل ءَ رد کنان ءَ داں انگت ءَ آئی ءِ سر ءَ کوش ءِ بھتام جنگ بیتگ ءُ آ پاھو ءِ کوٹی ءَ برگ بیتگ-

شنگ بیتگیں اھوال ءِ توک ءَ گوشگ بیتگ کہ اسماعیل ءِ گرگ ءِ وھد ءَ سیستان و بلوچستان ءِ پولیس ءِ سروک ءَ پارسی نیوز ءَ گپ کنان ءَ گوشتگ کہ اے کوش ءَ دگہ شش مردم گپتگ بیتگ اَنت ءُ آیانی ھم پٹ ءُ پول برجاہ اِنت –

روکپتی بلوچستان ءِ ھالانی شنگ کنوکیں تندجاہ ھال وش ءِ رد ءَ گوستگیں سال ءَ یک سد ءُ ھشتاد ءُ دو بلوچ پاھو دیگ بیتگ اَنت کہ اے جتا جتائیں زنداناں بندیگ بیتگ اَنت ءُ جتا جتائیں وئیلانی پُشدر ءَ ایرانی آمیدگس ءَ پاھو داتگ اَنت-