شال: گس پہ گس ءَ مپت ءَ کتاب سرکنوکیں بلوچ ورنا ءِ کسہ

سریاب ریڈرز کلب ءِ کمک کار وتی کیسگ ءَ زر پُر کن انت ءُ مردماں کتاب سر کن انت –

شال ءَ بلوچستان شھدربر جاہ ءِ ھشت دھ نودربرانی یک ٹولی یے وتی کیسگ ءَ زر دے اَنت ءُ مردماں کتاب سرکن انت – اے ورنایاں چاگردی ترامجاھاں وتی سریاب ریڈرز کلب ءِ نام ءَ اکاؤنٹ جوڑ کتگ کہ اود ءَ کساس شش سد کتابانی اکس ایر کنگ بوتگ ءُ آھانی توسیپ نبشتگ اَنت –

کتاب بین ان ٹائٹلز تہ ءَ ھر کسے کہ کتاب ءِ دوست دار ایت گڑا آئی ءَ کتاب ڈس ءِ جست ءَ کن انت ءُ سر ءِ کن انت ئِے –

سریاب ریڈرز کلب ءِ کمک کار انیس الرحمن ءِ رد ءَ آ ءُ آئی ءِ سنگت ھمک ماہ چار سد ءَ گیش کتابانی زراں چہ وتی کیسگ ءَ دے اَنت –

آئی ءَ گوشتگ کہ درساں پیش ھما کتاب کہ مئے گور ءَ ھست انت آھاں ما پیس بُک ءُ وٹسپ گروپانی تہ ءَ شئیر کنیں پد ءَ ھر ھما کتاب وانوکے کہ گوں ما ھال ءُ اھوال کنت گڑا ما چہ آئی ءَ ڈس ءَ زوریں –

آئی ءَ گوشتگ کہ کتاب سرکنگ ءِ ڈس گِس، دکان یا ھوٹل ءِ بیت کہ مئے کمکار سیکل یا موٹر سیکل ءِ سر ءَ کتاب ءَ ھمائی ءِ گور ءَ سر کن انت پد ءَ یک ماھے ءَ پد کتاب واپس آرگ بیت ءُ دوبر آئی ءِ پوٹو شئیر کنگ بیت –

انیس ءَ گوشتگ کہ ما اے کار ءِ ھچ زر نہ گریں ءُ پٹرول ءُ ایندگہ ھرچاں چہ وتی کیسگ ءَ پُر کن ایں تانکہ کتاب وانوک گیش ءَ چہ گیش بہ بنت –

سریاب ریڈرز ءِ گور ءَ اے وھدی کساس شش سد کتابانی تہ ءَ چار سد ءَ گیش بھر بوتگ انت ءُ اے کتاب گیشتر نودربراں وتی کتاب جاھاں داتگ انت –

انیس ءِ گوش ایت کہ مئے گور ءَ اے وھدی چارسد کتاب وانوک ھست کہ ھمک ماہ نوکیں کتاب وان انت – وشی ءِ گپ ایش انت کہ نوں کم کم ءَ مردم مارا وتی کتاباں دیگ ءَ انت –

اے کار ءِ بنداتی ءِ درگت ءَ انیس گوش ایت کہ دوھزار ءُ بیست ءَ کرونا ءِ نادراھی ءِ وھد ءَ آئی ءَ وتی سنگتانی گون ءَ شور کتگ ءُ ریدرز کلب ءِ جوڑ کنگ ءِ ارادو کتگ کہ اود ءَ بید ءِ زر ءَ کتاب ونت بہ کن اَنت – سریاب ریدرز کلب شال ءِ ھنچیں دمگے ءَ بندات کنگ بوتگ کہ اے وھداں بدامنی ءُ پسماندگی نام ءَ زانگ بوتگ اے کلب اولسر ءَ شال ءُ پد ءَ بلوچستان ءِ ایندگہ ھند ءُ دمگاں تالان بوتگ ھمے زوتاں ماں ھاران ءَ ھاران ریڈرز کلب ءِ نام ءَ شور کنگ بوتگ –

انیس ءِ واھشت انت کہ باندات ءَ آ بلوچستان ءِ ھر ھند ءُ دمگ ءَ ریڈرز کلب ءَ بندات بہ کنت تانکہ زانت ءِ رژنانی بلوچستان ءِ ھر گس ءَ سر بہ بیت –