بلوچستان : جتاجتائیں وئیلانی آسر ءَ شش مردم بیران، شانزدہ ٹپی بیتگ اَنت

بلوچستان ءِ جتاجتائیں دمگاں جتاجتائیں وئیلانی آسر ءَ شش مردم بیران وھدے شانزدہ ٹپی بیتگ اَنت ءُ یک لاشے دزکپتگ-

گیشیں ھالانی رِد ءَ بولان ءِ دمگ ڈھاڈر ءَ ائید ءَ پکنک ءِ وھد ءَ کور ءَ جان شودگ ءَ شال ءِ جھمنندیں ورناہ جلیل احمد ء مرزک میرانی آپ ءِ تہ ءَ بُکّ اِتگ بیران بیتگ-

ھمے وڑ دگہ یک وئیلے بلوچستان ءِ تیابدپی ھند گڈانی ءَ چہ کراچی ءَ پکنک ءَ اَتکگیں چاردہ سالی ئیں موسیٰ ء ولی محمد نامیں چُکے ءِ پاد شترگ ءِ سبب ءَ دریا ءِ تہ ءَ کپتگ ءُ بیران بیتگ-

گڈانی انتزامیہ ءَ چُک ءِ لاش در کتگ ءُ دمگی نادُراھجاہ ءَ برگ ءَ پد لاش کھول ءِ دست ءَ داتگ –

دومی نیمگ ءَ ھب کور ءَ جانشودان ءَ ھپت سالی ئیں چُکے بُکّ اِتگ ءُ بیران بیتگ، ریسکیو ٹولی ءَ لاش دستیگ کتگ نادُراھجاہ ءَ برتگ-

دگہ یک وئیلے بلوچستان ءِ دمگ ڈیرہ بگٹی ءِ ھند سوئی ءَ ناشناسیں سلاہ بندیں مردماں تھسیل بازار ءَ تیرگواری کتگ ءُ پی پی ایل سوئی گیس ءِ کاردار حاجی قمر دین بگٹی کُشتگ ءُ تتکگ اَنت-

ھمے وڑ چاگی ءَ مچ ءِ نزیک ءَ مساپر گاڑی ءِ چپی بوگ ءَ چہ گاڑی ءَ سواریں عطاء الرحمن نامیں مردمے بیران بیتگ وھدے کہ آ دگہ پانزدہ مساپر ٹپی بیتگ اَنت-

چاگی ریسکیو واکدار ءَ لاش ءُ ٹپی زوت الاج ءِ ھاتر ءَ نادُراھجاہ ءَ برتگ اَنت اود ءَ ٹپیاں دوا ءُ درمان کنگ ءَ پد گیشیں الاج ءِ ھاتر ءَ شال ءَ برتگ اَنت-

دگہ وئیلے تربت سیٹلائٹ ٹاؤن ءَ پرپٹ ءُ پک اپ گاڑی ءِ میان ءَ ڈک ورگ ءَ پرپٹ سواریں ورناھے ٹپی بیتگ-

ھُزدار ءَ پنکک ءَ آؤکیں مردمانی گاڑی مولہ ءِ ھند ءَ دمگی مردمے لگت داتگ، وئیل ءِ آسر ءَ چُک بیران بیتگ- دمگی مردماں انتزامیہ ءَ چہ وئیل درگت ءَ زوت گامیگج زورگ ءِ لوٹ کتگ-

زیارت ءَ انتزامیہ ءَ زیارت ءُ ھرنائی ءِ میانی دمگ ڈومیارہ ءَ یک مردمے ءِ کوھنیں لاشے دزکپتگ کہ آ پجّارگ نہ بیت بلے انتزامیہ ءَ لاش نزیکیں ءَ یک کارڈے دزکپتگ کہ آئی ءِ سر ءَ سید نزیر شاہ نام نبشتہ بیتگ-

لیویز فورس ءَ لاش دستیگ کتگ ءُ نادُراھجاہ ءَ برتگ گیشیں پٹ ءُ پول برجاہ ءَ اِنت-