بلوچستان ءَ ائید ءُ زورانسری بیگواھیانی ھاتر ءَ جوڑ کنگ بیتگیں کمیشن ءِ رپورٹ
ٹی بی پی شونگال
ائید چہ وشیاں چکاریں نیکراھی وشیانی روچ اِنت بلے بلوچستان ءَ زورانسری بیگواھیں مردمانی کھول ائید ءِ روچ ءَ ھم زھرشانیانی تہ ءَ گوازین اَنت۔ مروچی ائید ءِ روچ ءَ شال، تربت، ھزدار، گوادر ءُ اسلام آباد ءَ زورانسری بیگواہ بیتگیں مردمانی یل کنائنگ ءِ ھاتر ءَ زھر شانی بئیگ ءَ اَنت۔ ائید ءِ روچ ءَ زھرشانی ءُ کھولاں گوں یکجاھی درشانگ ءِ ھاتر ءَ چاگردی رسانکدر ءِ تندجاہ ٹوئیٹر ءِ سر ءَ کمپئن ھم جُنزگ ءَ اَنت۔
خضدار ءَ سائرہ بلوچ وتی برات آصف ءُ رشید ءِ یل کنائنگ ءِ ھاتر ءَ زھرشانی کنگ ءَ اِنت کہ آ گوستگیں پنچ سالاں چہ زورانسری بیگواھی ءِ آماچ اَنت، گودار ءَ رخسانہ بلوچ وتی دہ سالاں چہ زورانسری بیگواھیں اعظم دوست ءِ ھاتر ءَ پہ زھرشانی ءَ درکپگ ءَ اِنت ءُ شال ءَ پنچ ھزار روچاں چہ زھرشانی بنجل ءَ نشتگیں ماما قدیر بلوچستان ءِ تہ ءَ برجاھیں زورانسری بیگواھیانی ھلاس کنگ ءَ پہ ائید ءِ روچ ءَ ھم زھرشانی ءِ تہ ءَ گوازینگ ءَ اِنت۔
زورانسری بیگواھیاں بلوچستان ءِ ھزارانی کھول ذھنی ءُ زری رد ءَ ترندی ءَ گوں سانمند کُتگ اَنت ءُ بلوچستان ءَ نیکراھی ءُ راجی وشی ءُ شاتمانیانی روچ ھم زھرشانیانی تہ ءَ گوز انت، مزن مدتیں زھرشانی، لانگ مارچ ءُ ننداکاں ابید ھم زورانسری بیگواھیانی تہ ءَ کمی ءِ جاہ ءَ گیشی گندگ ءَ پیداک ءُ زورانسری بیگواھیں مردماں دروگیں میڑانی تہ ءَ کُشگ بئیگ ءَ اِنت۔
چہ ائید ءَ لھتیں روچ پیسر ہیومن رائٹس کمیشن آف پاکستان ءَ وتی ’امیت ءِ شوھاز ءَ سرگردان ءِ بلوچستان‘ ءِ نام ءَ مردمی اگبالانی بگیریانی سر ءَ راستی پولوکیں رپورٹ ءِ تہ ءَ بلوچستان ءَ زورانسری بیگواھیانی وئیلانی سر ءَ تُرس ءُ بیم ءِ درشان کنان ءَ گُشتگ کہ ڈیھ ایرادگیریں لیکھانی ھلاس کنگ ءِ ھاتر ءَ مزنیں کچے ءَ زورانسری بیگواھیاں کارمرز کنگ ءَ اِنت ءُ بلوچستان ءِ سیاسی جیڑھانی تہ ءَ ایسٹیبلشمنٹ ءِ دزمانجنی ءِ دارگ، زورانسری بیگواھیانی وئیلانی تہ ءَ ھواریں مردمانی پَٹ ءُ پول کنگ ءُ رسانکدراں بندوکیں مردمانی سلامتی ءُ آجوئی ءَ باوری کنگ ءِ ھاتر ءَ بلوچستان اسمبلی ءِ کانود اڈ دیگ ءِ لوٹ کنگ بیتگ۔
اسلام آباد مزن آمید ءِ چیف جسٹس اطھر من اللہ ءِ پرمان ءِ سر ءَ سردار اخترمینگل ءِ مستری ءَ بلوچ نودربرانی زورانسری بیگواھیانی بگیر ءَ جوڑ کنگ بیتگیں کمیشن ءَ فروری 2023ء ءِ تہ ءَ وتی رپورٹ سرجم کُتگ ءُ اسلام آباد مزن آمید گِس ءَ پیش کُتگ۔ کمیشن ءِ رپورٹ ءِ تہ ءَ بلوچستان ءَ زورانسری بیگواھیاں یک انچائیں ٹپے نامینگ بیتگ کہ آ پاکستان ءِ ھستی ءَ یکشل ءَ نزور کنگ ءَ اِنت ءُ کمیشن ءَ رپورٹ ءِ تہ ءَ گُشتگ کہ پاکستان ءِ جتاھیں شھدربرجاھانی تہ ءَ بلوچ نودربرانی نسل پرستی ھم بیگ ءَ اِنت۔ کمیشن رپوٹ ءِ تہ ءَ پدر کنگ بیتگ کہ بلوچ نودربرانی زورانسری بیگواھیانی تہءَ ڈیھی ادارگ ھوار اَنت ءُ آیانی گامگیج ھواریں راجانی پتر ءِ چارٹر ءِ ٹِک 55 بگیری اِنت۔
ہیومںن رائٹس کمیشن آف پاکستان ءِ راستی شوھازوکیں رپورٹ ءُ آمید گِسی کمیشن ءِ دزبندیانی سر ءَ گامگیج زیرگ ءُ زورانسری بیگواھیانی جیڑہ ءِ گیوار کنگ ءِ جاہ ءَ پارلیمنٹ ءُ آمید گِس ھاموش ندارگ چاروکانی کرد پیلو کنگ ءَ اَنت۔ پارلیمنٹ، زورانسری بیگواھیانی بل ءِ منارینگ ءَ ابید ھم بلوچستان ءِ تہ ءَ زورانسری بیگواھی ءُ بیگواھیں مردمانی بندیگ جاھی کوشانی دارگ ءَ بے سوب اَنت کہ اے بلوچ جیڑہ ءِ گیوار کنگ ءِ ھاتر ءَ پاکستانی پارلیمنٹ ءِ وتگڑیں سردستی ءِ راستی ءَ پجار کنت اِنت۔