سوڈان: جنگ بندی ءِ دزبندی ءَ ابید ھم عید ءِ روچ ءَ جنگ برجاہ، 413 مردم بیران

سوڈان ءِ جنگ بندی ءِ دزبندی ءَ ابید ھن بنجاھی شھر خرطوم ءَ جنگ برجاہ، ءُ آدینگ ءِ روچ ءَ بازیں جاھاں بمب تراک ءُ تیرگواریانی اھوال ھم اتکگ بیتگ اَنت-

ھال سر کنوکیں ادارہ اے ایف پی ءِ رد ءَ میان اُستمان ءِ جنرل انتونیو گوتریس ءُ امریکہ ءِ سیکریٹری ھارجہ انٹونی بلنکن ءَ کسانیں عید ءِ وھد ءَ سَے روچاں جنگ بندی ءِ دزبندی کتگ،بلے اے دزبندی ءِ ڈالچار کنان ءَ متحارف ٹولیانی جنگ ءُ چوپ برجاہ-

سوڈان ءِ ڈاکٹرانی بنجاھی کمیٹی ءِ نیمگ ءَ شنگ بیتگیں درشان ءَ گوشگ بیتگ کہ ماہ رمضان ءِ گڈی شپ ءَ خرطوم ءِ بازیں جاھاں تراک بیتگ اَنت ءُ پوج ءُ پیراملٹری ایپڈ اسپورٹ فورسز (آر ایس ایف) ءِ میان ءَ جنگ برجاہ اِنت-

درشان ءَ گوشگ بیتگ شھری وتی جان ءُ ساہ ءِ پھریزگ ءَ لوگاں چہ ڈن در مہ کہ کپ اَنت لوگانی توک ءَ بہ نند اَنت ءُ بے گناھیں مردمانی رکینگ ءَ ھردوکین نیمگاں جنگ بندی ءِ دزبندی کنگ بیتگ اَنت-

امریکہ ءِ سیکریٹری ھارجہ انٹونی بلنکن ءَ آدینگ ءِ روچ ءَ ھردوکیں جنرلزاں جتا جتا رھوت کتگ ءُ گپ تران ءُ جنگ ایر جتگ ءُ عید ءِ روچ ءَ داں بیست ءُ سَے اپریل ءَ جنگ بندی ءِ دزبندی کنگ بیتگ-

سوڈان ءِ لشکر ءِ سروک عبدال فتح الرھان ءُ پیراملٹری ریپڈ اسپورٹ ءِ سروک مھمد ھمدان دقلو ءِ میان ءَ لھتے ھپتگانی برجاھیں واک ءِ جد ءُ جھد ءُ پد بنجاھی شھر خرطوم ءَ ھردوکیں لشکرانی میان ءَ جنگ مَچ اتگ-

آدینگ ءِ روچ ءَ عید ءِ وھد ءَ سوڈانی لشکر ءِ سروک عبدل فتح البرھان ءَ ٹیلی وژن ءَ تران کنان ءَ اے جیڑہ ءِ گیش ءُ گیواری ءِ بارو ءَ ھچ وڑیں گپ نہ جتگ-

آئی ءَ گوشتگ اے سال ءَ عید ءَ مئے ڈیھ ءَ ھونریچی بوگ ءَ اِنت،تباھی اِنت، ویرانی اِنت ءُ تیرانی توراں ملک دوملک کتگ ءُ وش ءُ وشدلیانی وھد برتگ اَنت ما امیت کن ایں اے چکاس ءَ گیش ما یکجاہ بیگ ءُ یک پوج ءُ یک مھلوکے جوڑ بوگ ءُ دیم ءَ جنزان کن ایں-

میان اُستمانی ادارہ جانسلامتی ءَ آدینگ ءِ روچ ءَ داں اے جنگ ءَ انگت ءَ چار سد ےُ سیزدہ مردم مرتگ اَنت ءُ سَے ھزار ءُ پنچ سد ءُ پنجاہ ءُ یک مردم زدگ بیتگ اَنت-

میان اُستمان ءِ ورگ ءُ دیوکیں ادارہ ءَ جنگ ءِ وھد ءَ وتی سَے ھمراھانی بیرانی ءَ پد دمگ ءَ در شتگ-