بلوچ نودربر گل آزاد ءِ بیست ءُ سیمی بنجاھی لس مجلس سوبمندی ءَ گوں آسر

بلوچ نودربر گل آزاد (BSO Azad) بیست ءُ سیمی بنجاھی لس مجلس ءِ نیاد بیاد لمہ ء وتن بانک کریمہ بلوچ ءُ بلوچ نمیران ءُ بنام بیگواھیں بلوچانی یات ءَ مروچی سیمی روچ ءَ سوبمندی ءَ گوں آسر کنگ بوتگ ءُ گل ءِ اگدہ دار گچین کنگ بوتگ انت کہ درپشان بلوچ گل ءِ سرکماش ءُ زروان بلوچ کارگشاد گچین کنگ بوتگ انت –

بلوچ نودربر گل آزاد ءِ بنجاھی جارکش ءَ ماں رسانکدراں وتی شنگ کرتگیں درشان ءِ تہ ءَ گل ءِ سوبمندیں لس مجلس ءِ ھال شنگ کُتگ ءُ گوشتگ کہ گل بیست ءُ سیمی لس مجلس نیاد بیاد ءِ لمہ ء وتن بانک کریمہ بلوچ ءُ بلوچ نمیران ءُ بنام بیگواھیں بلوچانی یات ءَ مروچی سیمی روچ ءَ سوبمندی ءَ گوں آسر کنگ بوتگ کہ درپشان بلوچ ابید ءِ دیم ءَ اوشتوکیں مردم ءَ سرکماش وھدیکہ زروان بلوچ ابید ءِ دیم ءَ اوشتوکیں مردم ءَ کارگشاد گچین کنگ بوتگ انت –

جارکش ءَ گوشتگ کہ بیست ءُ سَیمی بنجاھی لس مجلس دیوان ءَ سرکماش ءِ تران، بنراھبند سازی، کارگشاد ءِ اھوال، نگدی دیوان، گل کاری، میان اُستمانی ءُ ھَندی سیاسی جاورھال ءَ ھوار آؤکیں گامگیج ءِ سر ءَ گوں دلجمی ءَ تران کنگ بوتگ-

آئی ءَ گوشتگ کہ لس مجلس ءِ اولی روچ ءَ بنجاھی سرکماش ءِ تران، بنراھبند سازی، کارگشادی اھوال، نگدی دیوان ءِ سرھالانی سر ءَ گپ ءُ تران کنگ بوتگ ءُ دومی روچ ءَ گل کاری، میان استمانی ءُ ھندی سیاسی جاورھال ءُ آؤکیں گامگیج ءِ یک بھرے ءِ سرھال ءِ سر ءَ گوں جوانی ءَ تران بوتگ- مروچی بنجاھی لس مجلس ءِ گُڈی روچ بوتگ کہ آؤکیں گامگیج ءِ پَشت کپتگیں بھر دیم ءَ جنز اِتگ کہ آئی ءِ تہ ءَ ھستیں جوڑشت پروشگ بوتگ ءُ دیوان گچینکاری ءِ نیمگ ءَ شُتگ ،گوستگیں بنجاھی مزن کارگشاد مھرزاد ءِ سروکی ءَ یک سے باسکی پترے جوڑ کنگ بوتگ کہ آ گچینکاری ءِ نیمگ ءَ شتگ- گچینکاریانی آسر ءَ گچینکاری پتر ءِ سرپان ءَ گل ءِ اگدھانی سر ءَ گچین بوتگیں بنجاھی کابینہ ءُ بنجاھی پتر ءِ باسکانی نام دیم ءَ آؤرتگ انت کہ آیانی تہ ءَ درپشان سرکماش ءُ زروان مزن کارگشاد گچین کنگ بوتگ-

بنجاھی جارکش ءَ گوشتگ کہ گچینکاری ءِ ھلاس بوگ ءَ رند بندیں کوٹی ءِ دیوان ھلاس کنگ بوتگ ءُ دیوان سوگندی نیاد ءِ نیمگ ءَ جنز اِتگ کہ گچین بوتگیں باسک ءُ زمہ دار گل ءِ گوستگیں سرکماش ابرم ءَ سوگند داتگ اَنت-

بنجاھی لس مجلس ءِ سوگندی نیاد ءَ گل ءِ گوستگیں سرکماش ابرم ءَ تران کُرتگ ءُ گْوشتگ کہ امیت ھمیش اِنت کہ بی ایس او آزاد ءِ نوک گچین بوتگیں سروک بلوچ ورنایاں گیشاں چہ گیش جُنز ءِ بھر جوڑ کن اَنت ءُ آیاں یکمشت ءُ یکراہ کن اَنت- راجی جنز ءَ نوکیں جُنزانی لوٹانی ھساب ءَ بی ایس او آزاد آشوبی باسکانی ھیلکاری ءِ کار ءَ برجم داریت۔ پہ بی ایس او آزاد ءَ اے پیمیں نا وش ءُ نگیگیں جاوراں اے آشوبی کار ءِ یکشل ءَ برجم دارگ ارزانیں کارے نہ اِنت بلے وتی پانزدہ سال ءِ سیاسی کیرئر ءِ کُتہ کاریانی بنیات ءَ گْوشت کناں کہ بی ایس او آزاد ءِ تہ ءَ اے پیمیں نا وش ءُ نگیگیں جاورانی دیم دارگ ءِ زِکت است اِنت- بی ایس او آزاد ءِ باسکاں گل ءِ باسک ءُ سروک ءِ نمیرانی، آوار جَنی ءُ بے کساس ژانگولیں جون وتی کوپگاں کتگ اَنت بلے آیانی ھیال،لیکہ ءُ کارانی تہ ءَ کدی اوں بگیری پیداک نہ بوتگ- بی ایس او آزاد ءِ باسکاں نہ ایوک ءَ دژمن ءِ دیم داشتگ بلکیں تھی پادکَشی اوں اوپار کتگ اَنت بلے راجی جنز ءِ مول، سینٹرل ڈیموکریسی، گل ءِ تہ ءَ راجمستری ءِ ربیت ءُ گل ءِ وتواکی کدی اوں سان زورگ ءَ نہ اشتگ ءُ ھمے گلانی سوبمندی ءِ مزنیں سوَب اَنت، ھمے ھسابیں پگر ءُ لیکہ بی ایس او آزاد ءَ مھکمیں گلے ءِ گوناپ ءَ دات کت کنت –

بنجاھی لس مجلس ءِ گچینکاری ءِ ھلاس بوگ ءَ رند گل ءِ زمہ داری نوکیں بنجاھی پتر ءِ کوپگاں دیگ بوتگ انت کہ چرائی ءَ رند سرکماش دْرپشان بلوچ ءَ بنجاھی لس مجلس ءِ دیوان ءَ تران کُرتگ ءُ گْوشتگ کہ چہ درساں پیش لس مجلس ءِ سوبمندی ءِ گون ءَ برجم بوگ ءَ من بی ایس او آزاد ءِ باسک ءُ تیوک ءَ گل ءِ گوستگیں راھشونانی ستا ءَ کناں کہ آیاں اے نا وشیں جاورانی میان ءَ نیاد گوں سوبمندی ءَ اڈ داتگ ، راستے کہ آشوبی ادارھاں جاور کدی اوں ایمن ءُ آسودگ نہ بنت ءُ بی ایس او آزاد چہ وتی جوڑشت ءِ اولی روچاں ھمے جاورانی دیمپان انت، پمشکا گل ءِ نشانگ مدام مزن ءُ پروگرام بندپتری بوتگ انت-

نوک گچین بوتگیں سرکماش درپشان بلوچ ءَ گوشتگ کہ بی ایس او آزاد ءِ آشوبی سنگتاں! چہ وتی جھد، توان ءُ دیمونیاں گل ءِ رھشونی ءِ جاہ ءَ سر بوگ یک نیمگے پمّا یک مزنیں شرپے داں دومی نیمگ ءَ یک باز مزنیں ڈُبّہ ءُ زمہ واری یے کہ سنگتاں وتی کوپگاں زرتگ- زاکر مجید کہ مرچی چہ چاردہ سالاں دژمن ءِ بندیگجاہ ءَ بند اِنت، کمبر چاکر ءِ ڈولیں مزن شانیں ورنا کہ آ دژمن ءِ آزارجاھاں اے باور کنائین ایت کہ من مرگ ءَ امبازاں زرت کناں بلے تئی گلامی ءَ نہ من آں، زاھد ءِ پیمیں مزن شانیں رھشون مرچی دژمن ءِ آزارجاھانی تہ ءَ بند انت – اے کلیں سنگتاں چوشیں مزنیں دیمونی پمشکا اوپار کتگ انت ءُ کنگ ءَ انت داں کہ بی ایس او آزاد ھرچ ڈول ءَ مھکم بہ بیت- پمشکا نوک گچین بوتگیں باسک سرپد بہ بنت کہ اے کسانیں بارے نہ یے کہ ما کوپگاں کتگ ءُ امیت انت کہ گل ءِ دیم ءِ دو سالی مراگشانی مھکم دارگ ءُ گیش شاھگان کنگ ءَ گل ءِ ھمبل چہ ھچ پیمیں دیمونی ءِ دیگ ءَ چک ءُ پد نہ بنت-

سرکماش درپشان ءَ گْوشتگ کہ بلوچ راجی جنز ءَ گیش مھکم کنگ ءُ آئی ءِ برجاہ دارگ ءَ ادارتی بنیاد ءَ گیش کار کنگ ءُ جھد ءِ گیش مھکم کنگ درکار انت- مئے جنگ یک نپر یاکہ یک راجے ءِ گون ءَ بوگ ءَ نہ انت بگندئے استانی بنیاد ءَ اڈ داتگیں مھکمیں ادارھانی گون ءَ بوگ ءَ انت کہ آیانی سر ءَ ھمک سال ءِ بنیاد ءَ کَرباں زر ھرچ کنگ بنت – مئے جنگ گوں ھما ھزاراں ادارھان اِنت کہ آیاں اے استان ءِ جوڑشت پہ وتی نپ ءُ سیتاں زندگ داشتگ – اے زورگری ءِ ھلاس کَنگ ءَ اداراتی سیاست ءُ جھد گیش مھکم کنگ ءُ نپری پگرچہ ھُنڈالاں ولگوج کنگی اِنت – بلوچ ورنایاں نہ تھنا گوں جزباتاں بلکیں گوں ھوش ءُ گوش ءُ وتی بودشتانی گون ءَ اے جنز ءَ بھر زورگی انت ءُ دیم ءَ روگی انت – مھکمیں ادارہ، نوکتریں سائنسی بودشت ءُ ھنراں بلوچ راجی جنز آکبتے ءَ سر بوت کنت – بلوچ راجی جنز اے وھداں ادارھانی بستار ءَ ساڑی انت ءُ پہ ھر چونیں استانے ءَ آجوئی ءِ جنگ ءُ آئی ءِ سوبمندی ءَ راجی جنز ءَ ھما استان ءِ دیم پہ دیمی کنگ ءِ ادارہ لوٹ ایت – بلوچ ورنا وتی بودشتانی سر ءَ گیشاں چہ گیش کار کنان ءَ راجی جنز ءَ بنجاھی ادارھے ءِ بستار ءَ دیم ءَ بیار انت۔ یک آزات ءُ وتواکیں بلوچستانے ءَ بلوچ ءِ راجی پجّار، زبان، دود ءُ ربیدگ ءُ مال ءُ مڈی پھریزگ بوت کن انت ءُ ڈیھ وشھالی ءِ مانزمان بوت کنت –

درپشان بلوچ ءَ دیمتر ءَ تران کنان ءَ گْوشتگ کہ بلوچ ورنایاں ءَ چہ لھتیں تھلیں راستیاں آشنا بوگی اِنت کہ آ بیست ءُ یکمی کرن ءَ یک انچیں استانے ءِ بگیری ءَ جنگ کَنگ ءَ اَنت کہ آ استان یک نیمگے امریکہ ءِ وڑیں زورآورے ءِ ھمراہ انت تاں دومی نیمگ ءَ چین ءِ وڑیں وتگڑیں کمیونسٹ ملکے ءِ گوما ھمکوپگ انت، ما چہ سردجنگ ءِ بائی پولر آرڈر ءَ دراتکگ ءُ یک انچیں اھدےءَ ایر کپتگیں کہ اود ءَ یونی پولر کیپیٹیلسٹ رھبند ءِ تہ ءَ وت ءَ مگکم کنگی اِنت۔ بلکیں مرچی ئیں زمانگ ءَ مھکم، تمرد، ھنرمَند ءُ گوں مزنیں زوراں ھمگرنچیں راج اے جھان ءَ منگ بنت ءُ آیانی پلہ مرزی کنگ بیت- نزوریں راج آجوئی ءِ بیرک دار بوت نہ کن اَنت بلکیں چہ توانمند ءُ ھنرمَندی ءَ راج آزات ءُ مھکم بنت- مارا چہ وتی زھناں ایردستی ءِ رٹا کشگی اِنت ءُ یک مزنیں توانمندی یے ءِ جوڑ بوگ ءِ پگر ءِ گون ءَ جھد کنگ درکار انت۔ بلوچ راجی جنزءَ اے وھداں نوکتریں بودشتانی درکار انت کہ چرائی ءَ آ اے استان ءِ ادارتی جوڑشت ءَ ھلاس بہ کن اَنت ءُ آئی جاہ ءَ بلوچ ءِ استانی جوڑشتے اڈ بہ دینت کہ پہ ایشی ءَ تھنا راجی جزبات کار نہ دنت بگندئے پہ ایشی ءَ مزنیں ھنر ءُ بودشت ئِے درکار انت کہ آ اے استانی جوڑشت ءَ دیمتر بہ بنت-

آئی ءَ گوشتگ کہ مارا چہ وتی جند ءُ جزباتی اوگاماں درآھگی اِنت ءُ راستیں بنیاداں یک استانے ءِ اڈ دیگ ءِ کارانی بارو ءَ وانگ ءِ نیم ءَ روگی اِنت۔ اے نوکیں زمانگ ءَ مزنیں بودشت ءُ ھنراں ابید زورگر ءِ بگیری ءَ جنگ بوت کت نہ کنت کہ آ چہ نوکیں جنگی سلاہ ءُ ساماناں کتار بند انت ءُ سدانی کچ ءَ جتائیں ادارھانی واھند انت –

درپشان ءَ گوشتگ کہ بلوچ جنز ءَ گیش بنجاھی ادارہ سازی ءِ نیمگ ءَ برگ ءِ درکار انت، چے ءَ کہ مئے دژمن یک مردمے نہ انِت، نہ کہ یک ادارھے – بلوچ یک سرجمیں استانے ءَ گوں دیم پہ دیم اِنت کہ آئی تہ ءَ ھر وڑیں ادارہ است، پمشکا پہ بلوچاں الّمی اِنت کہ وتی راجی جھد ءَ بنجاھی ادارہ سازی ءِ بنیات ءَ دیم ءَ بہ بارت- ایوکءَ نوکیں وھد ءِ لوٹ ءُ گزراں پیلو کنوکیں ادارہ اے استان ءِ دیم ءَ اوشتات کن اَنت ءُ بلوچ راج ءِ آجوئی ءِ مانزمان بنت۔ بلوچ ورنایاں لوٹیت کہ آ چہ کوھن ءُ پدمنتگیں کار رھبنداں بُرز نوکیں دور ءِ سائنسی، وانگی ءُ آشوبی کار رھبنداں کارمرز کنان ءَ بلوچ راجی آجوئی جُنز ءِ تہ ءَ بھر بُزور اَنت –

آزاد ءِ نوک گچین بوتگیں سرکماش ءَ گْوشتگ کہ جنگ آماچیں راجانی تہ ءَ چاگردی ءُ آشوبی بدلی آرگ ءَ ورنایانی کرد سک باز ارزشت داریت۔ بلوچ ورنا اے آشوبی دور ءِ تہ ءَ وتی زاتی نپ ءُ سیتّاں آمیدگس ءَ نشتگیں پارٹی ءُ سرکاری زر ھرید ءُ میر ءُ سردارانی دست ءَ وتا کارمرز بوگ ءَ بہ رکّین اَنت، وتی نپری زند ءَ در بیا اَنت ءُ وھد ءُ جاورانی رِد ءَ راجی ءُ مُچانکی لوٹ ءُ گزرانی پیلو کنگ ءَ جھد بہ کن اَنت – ما چہ اے راستی ءَ وتا اندیم کُت نہ کنیں کہ بلوچ گلامی زندے گوازینگ ءَ اِنت۔ بلوچ ءِ جنگ آماچیں راجے ءَ سیادی دارگ ءُ پدا روبرکتی راجانی وڑ ءَ آزات ءُ وشھالیں زندے گوازینگ ءِ گُمان کنگ بس یک وھد زوالی یے- بلوچ ورنا راجی جھد ءَ دیم ءَ ایر کنان ءَ وتی باندات ءِ پیسلہ ءَ بہ کن اَنت۔

آئی ءَ گوشتگ کہ زورگریں استان گوستگیں ھپت دھکاں بلوچ ورنایاں پروش دیگ ءِ جُھد ءَ اِنت۔ جاھے پہ تُرس ءُ بیم، تہ جاھے پہ لب ءُ لالچ، استان یکشل ءَ جھد ءَ اِنت کہ بلوچ ورنا وڑے ناں وڑے ءَ پدکنز بہ بنت۔ اے پندل ءِ تہ ءَ نا تھنا دژمن ءِ جند اِنت بگندئے ھما بلوچ ھم ھوار اَنت کہ آیاں چہ بنداتی روچ ءَ بلوچ راجی جھد ءِ سودا جتگ۔ اے راستی وتی جاہ ءَ کہ راجدپتر آیاں کدی نہ بکشائیت بلئے اے وھد اے لوٹ ھمیش اِنت کہ بلوچ ورنا تیوک ءَ بی ایس او آزاد ءِ آشوبی باسک وتی شپ ءُ روچاں یک بہ کن اَنت ءُ بلوچ راج ءُ بلوچ ورنایاں اے راجی زرمبشت ءِ ارزشت ءَ پوہ بہ کن اَنت-

درپشان بلوچ ءَ گوشتگ کہ من نمیرانیں بلوچانی وارساں گوشگ لوٹاں کہ سرسوبی ءُ آجوئیءِ منزل ءَ سر بوگ ءَ ابید مارا ھچ وڑیں باندات نیست۔ پہ بلوچ ءِ راجی آجوئی ءَ ھزارانی کساس ءَ بلوچ ورنایاں وتی بےبھائیں سر ندر کُتگ اَنت ءُ لس بلوچ ءَ ھر وڑیں سگّی اوپار کُتگ، بلئے راجدپتر گواھی دنت کہ راجانی جوڑ بوگ ءَ اے رنگیں نگیگیں ءُ گرانیں سپر الّمی اَنت۔ چُشیں ھچ راجے نیست کہ آیاں پہ وتی راجی آجوئی ءَ کُربانی نہ داتگ۔ مرچی ھزارانی کساس ءَ بے لوگ ءُ بزّگیں بلوچانی اوست گوں ما بندوک اَنت، پمشکا الّمی اِنت کہ ما وتی توان ءَ گوں سنگینی ءُ دل ءُ ستک پہ آجوئی ءِ منزل ءَ سر بوگ ءَ ھرچ بہ کن ایں –

نوک گچین بوتگیں مزن کارگشاد زروان ءَ وتی زمہ واری کوپگاں زرتگ ءُ بی ایس او آزاد ءِ بیست ءُ سیمی راجمان پتر بنام لمہ ء وتن کریمہ ءِ یات ءُ آجوئی ءِ نمیران ءُ بیگواھیں بلوچانی نام ءَ آسری جار جتگ –