نبشتانک: بی ایس او آزاد بلوچ نودربرانی درسگاہ
نبشتہ کار: البرز بلوچ
دی بلوچستان پوسٹ
بی ایس او ءِ نام ءِ اِشکُنگ ءَ بلوچ مھلوک پھر بند ایت کہ آئی ءَ اے ڈولیں ادارھے رس اتگ کہ پہ راج ءِ نودربراں درسگاھے ءِ بنیات ءَ آھانی رھشونی ءَ کنگ اِنت۔ اے ھمے پتر اِنت کہ اد ءَ بلوچ راجی رھشوناں وتی راجی آجوئی جنز ءِ بابت ءَ پِگری ھیل گپتگ ءُ راجی جنز ءِ رھشونی ءَ کنگ ءَ اَنت۔ اے درسگاہ ءَ بلوچ چاگرد ءِ تہ ءَ چاگردی ءُ راجی آشوب آران ءَ مرچی بلوچ راج ءَ را سرجمیں بلوچستان ءَ یک بیگ ءِ سکین داتگ ءُ ھمے پگر ءِ ولّ ءَ چہ رُستگیں بر ھرچ بلوچ دمک ءُ کوچگاں وڑے نا وڑے ءَ گِندگ ءَ کائینت۔ ھزارانی کچ ءَ ورنایاں اے پتر ءِ وسیلہ ءَ وتی ساچستی بود درنگاز اتگ اَنت ءُ مھکمیں آجوئی پنت زوران ءَ جنز ءِ جتائیں سنگراں وتی کرد ءَ پیلو کنگ ءَ اَنت۔بلے اے گپ ھم شموشگی نہ اِنت کہ بازیں ورنا گمے درسگاہ ءِ تہ ءَ اوار بیتگ اَنت بلے جتائیں ھیل ءُ بھانیاں راہ ءِ دیم ءَ مکسد ءَ چپ شتگ اَنت ءُ آجوئی کاروان ءَ شُت کُت نہ کتگ ءُ یلہ داتگ اش۔ بازیناں جتائیں نپری،ٹولی ءُ پاٹی ءِ نپانی واستا ھم اے ادارہ کارمرز کتگ ءُ مھکمیں تچکیں بلوچ ورنایانی درسگاہ پرُشت ءُ پروش ءِ آماچ کُتگ۔ بلے راست گوْشتگ ماما تالپور ءَ” بی ایس او بلوچ راجی جنز ءِ ارواہ اِنت۔” اے ارواہ ءَ اِنچو گٹگیر کنگ ءَ پد ھم وتی ساہ نہ داتگ اَنت، کپگ ءُ پروشگ ءَ پد ھم دوبر پاد اتکگ ءُ مِنزل ءَ جنزان بیان بیتگ۔ اے ادارہ ءَ سرانی سر جوڑ کتگ ءُ بلوچ جنز ءَ داتگ کہ مرچی بلوچ جنز ءِ رھشونی ءَ کنگ ءَ اَنت۔ بی ایس او آزاد ءَ بلوچ چاگرد چہ تھار ءُ تنکیں سوچ ءَ کش اتگ ءُ راجی مُچی ءِ بھر کتگ، بلوچ چاگرد مزہبی، ٹکی، قبائلی ءَ اوار ایندگہ ٹولیاں بھر بیتگ بلے اے ادارہ ءَ بلوچ ورنا ءُ لس مھلوک ءِ تہ ءَ سِنچ ءُ سرپدی آران ءَ بلوچ چاگرد چہ اے ھلِّتاں کش اتگ ءُ راجی ھوالہ ءَ یکجاء کتگ۔
بی ایس او ءِ بست ءُ سئیمی بنجاھی لس مجلسی دیوان(تئیسویں مرکزی کونسل سیشن) بلوچ راجی جنز ءِ تہ ءَ نوکیں راھے پچ کنت۔ ھمے گندگ بیت کہ نوکیں رھشون ھستیں وھد ءِ بلوچ راجی جنز ءِ لوٹ ءُ گُزراں سرپد ءُ پوہ اَنت ءُ گگتریں ءُ مھکمیں رنگے ءَ بلوچ ورنایانی رھشونی ءَ کت کن اَنت۔ ھستیں وھد ءَ بی ایس او ءِ سر ءَ اِنچو کریک ڈاؤن ءُ آھی ءِ رھشون ءُ جھدکارانی زورانسری بیگواہ کنگ ءُ آھانی زانگولیں جونانی ماں ویراناں دور دیگ ءَ پد ھم بنجاھی لس مجلسی دیوان ءَ برجم دارگ داد کرز ایت۔ پہ دل ءُ ستک ھما ورنایانی جُھد ءُ مکلسی ستا کرز ایت کہ اے آجوئی ءِ مکسد ءَ دمانے ھم پُشت نہ داتگ ءُ ھرچ استانی ءُ رد آشوبی تاکتانی دیم ءَ چو البرز ءِ کوہ ءَ مِکّ بیتگ اَنت ءُ اشانی دیم اِش داشتگ۔ چوناہ ءَ آشوبی جھدکارانی واستا کربانی دیگ ءُ گرانی ءُ سکی ءِ سگگ چوشیں مزنیں ھبرے نہ اِنت چیاکہ کسے اے راہ ءَ گچین کنت گڑا آ زند ءِ سرجمیں آسراتیاں سرگْوزْ ایت ءُ وتی مکسد ءَ سرجم کنگ ءِ ھاتر ءَ وت ءَ ندر کنت بلے اینچو زلم ءُ زوراکیاں، رھشون ءُ جھدکارانی گار ءُ بیگواھیانی ءُ نمیرانی ءَ پد ھم اے جاوراں بی ایس او ءِ ورنایانی مرکزی کونسل سیشن دارگ وتی تہ ءَ سکیں مزنیں ھبرے۔
چوناھیگا بلوچ سیاست ءِ دپتر ءِ تہ ءَ کونسل سیشن سکیں مزنیں ارزشتے داریں مراگھے ءُ بلوچ نودربر سیاست ءِ تہ ءَ بی ایس او کونسل سیشن ھما دیوان بیتگ کہ سرجمیں بلوچستان ءَ چہ بلوچ ورنا اتکگ ءُ یکجاہ بیتگ اَنت ءُ دیوان ءَ بھر اش زرتگ ۔ مرچی بہ گندے اشانی ارزشت یک کچے ءَ کم ترِ اتگ ءُ ایشی ءِ زمہ وار بلوچ ورنا اَنت کہ جتائیں گڈ ءُ منجی ءُ ھیل ءُ بھانیاں وتا چہ سیاسی امل ءَ دیر داشتگ ایش۔ یک راجے ءِ ورنایاں وتی راجی گل ءُ ادراھانی سر ءَ پھر بندگی اِنت ءُ آھانی پلہ مرزی کنگی اِنت بلے مئے راج ءِ لھتے ورنایاں ھلّتے زرتگ کہ وتی ادارھانی دوست دارگ ءُ پلامرزی ءِ بدل ءَ دریں مردم ءُ ادراھانی رند ءَ کپ اَنت ءُ جتائیں لیکھانی تہ ءَ وت ءَ گڈ ءُ منج اش کتگ ۔ ھمے ھاتر ءَ مرچی کونسل سیشن ءِ جاہ ءَ( مزہبی اجتماع) ءُ ایدگہ ریاستی میڑہ گیش بیان اَنت ءُ مھلوک ءِ دلگوشی ھمے راج دژمنیں پندلانی نیمگ ءَ روان اِنت۔ بی ایس او آزاد ءِ کونسل سیشن ءِ سر ءَ بازیں امیتے دارگ بیت کہ اے ھمے ورنا اَنت وتی ساہ ءُ نپری واھشتاں درتکگ ءُ بلوچ جھد ءِ بھر اَنت، اود ءَ بیتگیں سیاسی ءُ آشوبی ھبر ءُ پیسلہ سرجمیں بلوچ چاگرد ءِ گھتری ءِ مانزمان اَنت۔ مرچی بلوچ ورنا جتائیں استانی ڈسکورسانی آماچ اَنت بلے ایشانی ھلاپ ءَ اوشتوکیں ورنا گل بی ایس او آزاد ءِ اِنت کہ انچو گوْست ءَ ایشانی ھلاپ ءَ اوشتاتگ مرچی گھتریں رنگے ءَ اوشتیت ءُ ایشاں پروش دات۔
مرچی اے دمگ ءِ تہ ءَ بلوچ گھگیری پہ ایندگہ راجاں چیدگے ءُ بلوچ آشوبی ورنا پہ ایندگہ راجانی ورنایانی واستا مزنیں درور اَنت۔ بلوچ ورنایاں ھمے ادارہ ءِ وسیلہ ءَ سرانی کربان کنگ ءُ ھونانی ریچگ ءَ گوں وتی راجی جھد منارینتگ۔ بلوچ راج وش بھتے کہ آئی ءَ اے وڑیں نودربر ادارھے رس اتگ کہ آ بلوچ ورنایانی پگری ءُ شعوری تربیت ءَ کنگ ءَ اِنت۔ بلوچ ورنا ءُ نودربر اے موہ ءِ ارزشت ءَ بہ زان اَنت ءُ اے کاروان ءِ مساپر بہ بنت ءُ بلوچستان ءِ آجوئی ءِ جھد ءَ آوار بہ بنت۔ بلوچ ورنایاں زی ءُ پیریگیں وتگڑیں گڈ ءُ منجیاں چہ درایگی اِنت ءُ املی پِڑا بلوچ راجی جنز ءِ بھر بیگی اِنت اگاں نہ بلوچ راج تھاری ءِ مُجاں گار بیت اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔