شال: بیگواھیں مردمانی ھاتر ءَ زھرشانی برجاہ

چہ بلوچستان ءَ زورانسری آوار جنگ بوتگیں مردمانی یل نہ کنگ ءِ بگیری ءَ برجاھیں درجکشیں زھرشانی بنجل ءَ مروچی 5 ھزار ءُ سینزدہ روچ سرجم بوتگ انت – مروچی بی ایس او پجار ءِ سرکماش زبیر بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اتگ-

بنجل ءَ اتکگیں بی ایس او ءِ باسکانی گوم ءَ.تران کنان ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءَ گوشتگ کہ چہ دژمنءَ ترسناکتر ھما آستونک ءِ مار انت کہ بلوچ ءِ دروشم ءَ بلوچ ءِ گِسانی نزیک ءَ انت ءُ بلوچ ءِجھد ءَ بے سوب کنگ ءِ ھاتر ءَ دژمن ءِ کمکار جوڈ بوتگ انت ءُ آھانی تہ ءَ لھتے وت ءَ بلوچ راج ءَ درد وار زاھر کنت بلے راستی ءَ آ بلوچ راج ءَ.مدامی گلان جوڈ کنگ ءِ کار ءَ کنگ ءَ انت ءُ چاریگری ءِ کار ءَ کن انت ءُ زورگیرانی کمک ءَ کن انت –

ماما قدیر بلوچ ءَ گوشتگ کہ دژمن ءِ پجارگ ءَ ھچ وڈیں وتن دوست ءِ ردی کت نہ کنت پرچاکہ مئے میان ءَ گلامی ءُ واجھی ءِ رشتہ انت – انچو زلم ءُ زوراکیاں پد ھم مئے تہ ءَ مھکمی نہ اتکگ اگاں ما مھکم بہ بوتینتے وتی دوست ءُ دژمن پجا اؤرتگ ات –

ماما قدیر بلوچ ءَ گوشتگ کہ کاروان دیم ءَ جنزان انت ـ نمیران بوتگیں سرانی یات مدامی مئے ھوسلہ ءَ گیش کن انت ـ بلے المی ایش انت انکس تمرد ءُ نیک نیت، پھتو، نزریاتی سنگتانی واھگ ارمانانی سرجم کنگ ءَ.مارا وتی زاتی واھشت ءُ انا ، سستی، گروہی سوچ ءَ چہ درآیگی انت ءُ پھتویں اردھانی ھمراھی ءَ آھانی مشن دیم ءَ برگی انت – دژمن ءِ ھر وڈیں زوراکیانی پسو ءَ یک بوگ ءُ وتی راجی تاکت مھکم ءَ چہ مھکم تر کنگی انت ـ وتی چاگرد ءِ تہ ءِ ناسوریں دژمن ءِ کمک کارانی احتساب کنگی انت ھما کہ دژمن ءِ ھک ءَ پرایمنیں جھد ءِ بگیری ءَ زبان دراجی کنگ انت راج ءَ چہ بیگواھیں مردمانی پرایمنیں جھد ءَ مایوس کنگے کوشست ءَ کنگ ءَ انت -.

آئی ءَ گوشتگ کہ وتی ھوسلہ ءَ مدامی برز کنگی انت دیمھونی دیگ ءَ چک ءُ پد بوگی نہ انت ءُ پرزندانی یل کنائینگے راستیگیں راج ءِ برجاہ دارگ ءَ وتی کرد پیلو کنگی انت –