بولان ءَ لشکری زوراکی برجاہ – ماما قدیر بلوچ

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی 5 ھزار ءُ نُھ روچ سرجم بوتگ انت –

مروچی چہ کلات ءَ سیاسی ءُ چاگردی باسک عبدالحمید بلوچ، نور محمد بلوچ ءَ ھوار دگہ مردماں بیگواھیں مردمانی کھول ءِ گوم ءَ دلپدردی درشان اِتگ –

گل ءِ کمک سرکماش ماما قدیر بلوچ ءَ گوشتگ کہ بلوچستان ءِ دمگ بولان ءِ گیشتریں ھند ءُ دمگاں گوستگیں سَے روچ انت کہ پاکستان ءِ آرمی ءِ نیمگ ءَ ملٹری آپریشن کنگ بوگ ءَ انت –

ماما قدیر بلوچ ءِ رِد ءَ گوانکو، انٹرنیٹ ءَ ھوار ھال اھوالی درسیں آسراتی پوج ءَ بند کتگ انت ءُ چریشی ءِ سوب ءَ ما ھچ وڈیں ھالاں سرپد نہ انت –

آئی ءَ گوشتگ اشکُتگیں ھالانی رد ءَ آرمی لشکر کشی ءِ میان ءَ لس مردمانی گِس ءُ مال دلوتانی لُٹ پُل ءَ کنگ ءَ انت بلے پاکستانی پوج ءِ نیمگ ءَ درسیں ھال اھوالی آسراتی بند کنگ ءِ سوب ءَ ما اے وڈیں ھالاں راست ءُ پکا کُت کنگ ءَ نہ انت –

ماما قدیر بلوچ ءَ گوشتگ کہ کاؤنٹر انٹرجنسی ءِ نام ءَ بلوچستان ءِ تہ ءَ بے رھمی ءَ گوں لشکر کشی ریاست ءُ بلوچ ءِ میان ءَ بؤکیں جنگ ءَ دراجکشی ءِ سوب جوڈ بوت کنت –

ماما قدیر ءَ گوشتگ کہ گل بلوچستان ءَ زورانسری آوار جنی ءَ ھوار ایندگہ انسانی ھکانی لگتمالء بگیری ءَ وتی زھرشانی برجاہ داران ءَ ایردستانی ھاتر ءَ وتی توار ءَ برز کنت –