بلوچستان شھدربرجاہ ءِ ماسٹر زکات ءُ ھیرات یکجا کنگ ءَ انت

بلوچستان شھدربرجاہ ءِ ماسٹر ءُ کارداراں بلوچستان شھدربرجاہ ءَ زری جنجال ءَ چہ درکنگ ءِ ھاتر ءَ زھرشانی کنان ءَ بلوچستان شھدربرجاہ ءِ ھاتر زکات ءُ ھَیرات یکجاہ کنگ بندات کتگ –

دوشمبے ءِ روچ ءَ بلوچستان شھدربرجاہ ءِ مالی نگیگی ءِ بگیری ءَ ماسٹر ءُ کاردارانی زھرشانی برجاہ بوتگ ءُ آیاں مروچی تھنا شھدربرجاہ ءِ دیم ءَ سریاب دگ ءَ زھرشانی نہ کتگ بلکنہ ماسٹر، اپسر ءُ کارداراں زھرشانی کنان ءَ بلوچستان ءِ شھدربرجاہ ءِ ھاتر ءَ زکات ءُ ھیرات ھم گپتگ –

آھانی گوشگ انت کہ بلوچستان شھدربرجاہ ءَ بازیں سالے بیت کہ مالی نگیگی ءِ دچار انت کہ چریشی ءِ سوب ءَ نوں کاردار لاچار انت کہ نوں شھدربرجاہ ءِ دیم ءَ زکات ءُ ھیرات بگر انت –

آھاں چہ بلوچستان ءِ مردماں گوں لوٹ کتگ ءُ گوشتگ کہ شھدربرجاہ ءَ مالی بحران ءَ درکنگ ءِ ھاتر ءَ ماسٹر کارداراں ھیرات دیگ بہ بیت –

زانگ بہ بیت بلوچستان شھدربرجاہ شال ءِ کار داراں سَے ماہ بیت کہ وتی پگار ءَ زبھر انت چریشی ءِ سوب ءَ بازیں ماسٹر ءُ کاردارانی گِس ءَ پہ ورگ ءَ نان نیست -.

مالی بحران ءِ سوب ءَ ماسٹر ءُ کاردارانی جوائنٹ ایکشن کمیٹی ءَ گوستگیں ھپتگ ءَ بلوچستان شھدربرجاہ سرجمی ءَ بند کتگ ءُ چکاسانی ھم بائیکاٹ کتگ –