بلوچستان : جتاجتائیں وئیلانی آسر ءَ زالبولے ءَ ھوار پنچ مردم بیران، دو ٹپی بیتگ اَنت

بلوچستان ءَ جتاجتائیں دمگاں وتکشی ءُ تیرگواری ءِ وئیلانی آسر ءَ پنچ مردم بیران دو ٹپی بیتگ اَنت-

گیشیں ھالانی رِدءَ بلوچستان ءِ دمگ پنجگور ءِ ھند چتکان بازار سونار مارکیٹ ءِ نزیک ءَ ناشناسیں سلاہ بندیں مردماں تیرگواری کتگ ءُ دزپروم ءِ جھمنند عبدالغفور ء بھرام نامیں مردمے کشتگ ءُ تتکگ اَنت-

وئیل ءِ ھال رسگ ءَ پولیس ءُ لیویز ٹولی وئیل جاہ ءَ سر بیتگ اَنت، لاش نادُراھجاہ برتگ پولیس گیشیں پٹ ءُ پول کنگ ءَ اِنت-

دومی نیمگ ءَ مستونگ ءَ بس اڈہ ءَ ناشناسیں مردمانی تیرگواری ءَ چہ مولوی ضیا الرحمٰن ابابکی نامیں مردمے سک ٹپی بیتگ چریشی ءَ زوت شھید نواب غوث بخش رئیسانی نادُراھجاہ برگ بیتگ کہ اود ءَ ٹپّانی درد نہ سگ اِتگ ءُ بیران بیتگ-

ھمے وڑ ڈیرہ بگٹی ءِ دمگ سوئی ءَ ناشناسیں مردمانی تیرگواری ءَ چہ فیاض نامیں مردمے بیران وھدے کہ ھُزدار ءَ دُزانی نیمگ چہ شھریاں پُلّگ ءِ وھد ءَ تیرگواری ءَ چہ شھری یے ٹپی بیتگ-

بلوچستان ءِ بُنجاھی شھر شال ءِ دمگ ائیرپورٹ دگ بلیلی کسٹم ءِ نزیک ءَ ناشناسیں مردمانی تیرگواری ءَ چہ یک مردمے بیران اُرشکار تتکگ پولیس ءَ لاش دستیگ کتگ نادُراھجاہ برتگ، گیشیں پٹ ءُ پول انتزامیہ ءَ کنگ ءَ اِنت-

انچش بلوچستان ءِ دمگ کیچ ءِ ھند مند لبنان ءَ اناگھی تیر لگگ ءَ چہ زالبولے ٹپی بیتگ ءُ الاج ھاتر ءَ تربت ءَ برگ بیتگ-

دومی نیمگ ءَ شال سریاب ءِ دمگ کیچی بیگ ءَ یک لوگے ءِ تہ ءَ زالبولے ءَ وت ءَ تیرجتگ ءُ وتکشی کتگ کہ آئی ءِ لاش گیشیں پٹ ءُ پول ھاتر ءَ سول نادُراھجاہ شال ءَ برگ بیتگ-

وتکشی ءِ سوب زانگ نہ بیتگ-

زانگ بہ بیت بلوچستان ءَ وتکشی ءَ وئیل ءِ کچ ءِ تہ ءَ گیشی گندگ آھگ ءَ اِنت- ھمے سال ءَ چار ماھانی تہءَ دی بلوچستان پوسٹ ءَ یکجاہ کتگیں کچ کساس ءِ رِد ءَ وتکشی ءِ وئیل یک درزنے ءَ گوستگ اَنت-

کچ ءُ کساس رِد ءَ گیشتریں کیس بلوچستان ءِ دمگ کیچ ءَ نکش بیتگ- اشی ءَ اَبید پنجگور، گوادر، ھب چوکی ءُ ڈیرہ بگٹی ءَ ھم کیس نکش بیتگ-

سرجمیں بلوچستان ءَ کہ اود ءَ وتکشی ءِ وئیل یک تُرسناکیں دروشمے ءَ گیشی گندگ آھگ ءَ اِنت دومی نیمگ ءَ ھکومت وتکشیانی گر ءُ دار ءِ ھاتر ءَ بے تواری ءَ دگہ ھچ گندگ نیاھگ ءَ اِنت-