بلوچستان : جتاجتائیں وئیلانی آسر ءَ شش مردم بیران, بیست ٹپی بیتگ اَنت

بلوچستان ءِ جتاجتائیں دمگ شال ، کیچ ، مستونگ ، نوشکی ، ھاران ءُ سبی ءَ تیرگواری ءُ دگ وئیلانی آسر ءَ شش مردم بیران بیست ٹپی بیتگ اَنت-

گیشیں ھالانی رِد ءَ شال سٹیلائٹ ٹاؤن ءِ دمگ چہ بلوچ کالونی ءَ تیرگواری ءَ زالبولے ءَ ھوار دو مردم بیران بیتگ اَنت-

لاش نادُراھجاہ ءَ برگ بیتگ انتزامیہ ءَ گیشیں پٹ ءُ پول بندات کتگ-

ھمے وڑ مستونگ ءِ دمگ میجر چوک سر ءَ سلاہ بندیں مردماں تیرگواری کتگ سبزی بھاکنوک رسول بخش نامیں مردمے ٹپی کتگ ، چریشی ءَ نگیگیں جاوراں نادُراھجاہ ءَ برتگ –

ھمے وڑ نوشکی ءَ تیرگواری ءِ آسر ءَ دودا ء میر رسول خان بادینی نامیں مردمے سک ٹپی بیتگ کہ آ دوا درمان کنگ ءَ پد الاج ھاتر ءَ شال ءَ برگ بیتگ-

انچش کیچ ءِ دمگ بلیدہ ءَ گوستگیں روچ ءَ بلیدہ ءِ دمگ گلی ءَ جمیل مراد نامیں مردمے ءِ سر ءَ تیرگواری کتگ ءُ کُشتگ-

اِھوالکارانی رِد ءَ اے مرد ء سیادی سرکاری پلامرزی کنوکیں ٹولی ءَ اِنت چہ-

دگہ یک تیرگواری ءِ وئیلے ھاران ءِ شھر لتاڑ دگ بائی پاس کُلان ءِ ھند ءَ کہ اود ءَ ناشناسیں سلاہ بندیں مردماں ظفر ء صالی ءِ لوگ ءِ تہ ءَ پترتگ اَنت تیرگواری اِش کتگ ءُ تیرگواری ءِ آسر ءَ ھاران ءِ جھمنند ماسٹر احمد دُرکزئی نامیں مردمے ھما دمان ءَ مرتگ وھدے کہ زالبولے سک ٹپی بیتگ-

تیرگواری ءَ پد اُرشکار تچگ ءَ سوبمند بیتگ اَنت- پولیس ءَ پٹ ءُ پول بندات کتگ ءُ اُرشکارانی شوھازگ بندات کتگ-

سبی ءَ تُرند روکیں گاڑی چپی بیگ ءَ چہ دو زھگ بیران ، زالبول ءُ زھگاں ھوار ھپدہ مردم ٹپی بیتگ اَنت-

لیویز گوشگ رِد ءَ سبی ءِ دمگ بائی پاس لمجی ءِ ھند ءَ شال ءَ رؤکیں مالدارانی ٹرک تُرند روگ ءِ سبب ءَ چپی بیتگ چریشی ءَ ٹرک ءَ سوار دو زھگ بیران بیتگ، زالبول ءُ زھگاں ھوار ھپدہ مردم ٹپی بیتگ اَنت-

زانگ بہ بیت بلوچستان ءَ دگانی پروشت ءُ پروش ءِ سبب ءَ ھمکروچ وئیل دیم ءَ کاینت ءُ چریشی ءِ آسر ءَ بازینے بیران ءَ بازینے ٹپی بنت-