آئی پی ایل ءِ شانزدھمی سیزن ءَ شمبے ءِ روچ ءَ چار ٹیم ممبئی انڈین ءُ چنئی سُپر کنگز، راجستھان رویال ءُ دھلی کیپیٹلز ءِ میان ءَ گوازی کنگ بوتگ کہ چنئی سپر کنگز ءَ ھپت وکٹ ءُ راجستھان ءَ پنجاہ ءُ ھپت رناں گوازی کٹ اِتگ انت –
ممبئی ءُ چنئی ءِ میان ءَ بوتگین گوازی ءَ ممبئی ءَ بیست اووراں ھشت وکٹانی تاوان ءَ یکسد ءُ پنجاہ ءُ ھپت رنانی ٹارگٹ ایرکتگ کہ چنئی ءَ 18.1 اوور ءَ بس سَے وکٹانی تاوان ءَ ٹارگٹ پروش اِتگ، اجنکیا رہانے ءَ بس بیست ءُ ھپت بالاں شست ءُ یک رن جوڈ کتگ –
شمبے ءِ روچ ءَ بوتگین گوازی ءَ کپٹن دھونی ءَ ٹاس کٹ اِتگ ءُ اولسر ءَ بالنگ کنگ ءِ شور کتگ – ممبئی ءِ کپٹن رویت شرما ءُ ایشان کشن ءَ بندات جوانی ءَ کتگ بلے ھردوکاں چشیں ھاسین رزلٹ ءِ نہ داتگ وکٹانی کپگ ھم زوت بندات بوتگ کہ آئی ءِ رزلت اے در اتکگ بیست اوورانی تہ ءَ ممبئی ءَ ھشت وکٹانی تاوان ءَ بس یکسد ءُ پنجاہ ءُ ھپت رن جوڈ کتگ –
ممبئی ءِ نیمگ ءَ درساں گیش سِی ءُ دو رن ایشان کشن ءَ بیست ءُ یک بالاں جوڈ کتگ، ٹم ڈیوڈن ءَ بیست ءُ دو بالاں سِی ءُ یک، تلک ورما ھژدہ بالاں بیست ءُ دو، روہت شرما ءَ سینزدہ بالاں بیست ءُ یک، رتک شوقین ءَ سینزدہ بالاں ھشدہ رن جوڈ کتگ ءُ ناٹ آؤٹ بوتگ ءُ کمیرون ء یانزدہ بالاں دوازدہ رن، سوریا ءَ بس یک رن ءِ جوڈ کتگ ءُ اؤٹ بوتگ ٹرسٹن ءَ پنچ ءُ پیوش ءَ شش رن جوڈ کتگ ءُ ناٹ آوٹ بوتگ –
چنئی نیمگ ءَ رویندر جڈیجہ ءَ درساں چہ سوبمندتریں بالر بوتگ کہ آئی ءَ چار اووراں بس بیست رن داتگ ءُ سَے جوانیں وکٹ ایشان، کمیرون، تلک آؤٹ کتگ انت – مشیل سینٹنز چار اووراں بیست ءُ ھشت رن داتگ تشار ءَ سَے اووراں سِی ءُ یک دو دو وکٹ ھردوکاں گپتگ وھدیکہ یک وکٹ ءِ سساندا گپتگ ءُ چار اووراں سِی ءُ ھپت رن داتگ –
چنئی نیمگ ءَ یکسد ءُ پنجاہ ءُ ھشت رنانی ٹارگٹ پروشگ ءِ ھاتر ءَ اوپنر ءَ ڈیوون کانوے ءُ ریتوراج پٹ اتکگ انت ءُ پدا اجنکیا رہانے ءَ بس بیست ءُ ھپت بالاں ھپت چوکا ءُ سے چکا جتگ ءُ شست ءُ یک رن جوڈ کتگ آئی ءَ بس نوزدہ بالاں نیم سنچری کتگ ءُ اے آئی پی ایل ءَ زوت تریں سنجری جوڈ کنوک بوتگ – پدا رند ءَ شیوم دوبے ءَ بیست ءُ شش بالاں بیست ءُ ھشت رن، امباتی ءَ شانزدہ بالاں بیست رن جوڈ کتگ ءُ ناٹ آؤٹ بوتگ – ریتو راج ءِ ھم ستاکرزیت کہ آئی گوازی بندات کتگ ءُ تاں گڈسر ءَ آؤٹ نہ بوتگ ءُ سِی ءُ شش بالاں چِل رن جوڈ کتگ – ڈیوون رن جوڈ کنگ ءَ بے سوب بوتگ کہ آئی ءَ چار بالاں ھچ رن جوڈ نہ کتگ ءُ واتر بوتگ – پہ کٹگ ءِ ھاتر ءَ یکسد ءُ پنجاہ ءُ ھشت رنانی ٹارگٹ چنئی ءَ 18.1 اوور ءَ بس سَے وکٹانی تاوان ءَ گپتگ انت – چہ ممبئی ءَ چنئی ءَ بس ھپت وکٹانی سوبمندی وتی نام ءَ کتگ –
شمبے ءِ روچ ءَ بوتگیں دومی گوازی راجستھان رائل ءُ دھلی کیپٹلز ءِ میان ءَ بوتگ کہ راجستھان ءَ پنجاہ ءُ ھپت رناں گوازی کٹ اِتگ –
دھلی ءِ کہ بیٹنگ بندات بوتگ گڈا اولی اوور ءَ ٹرینٹ بولٹ ءَ دو وکٹ گپتگ، پرتھویشا ءَ سَے بالاں ھچ رن جوڈ نہ کتگ ءُ واتر بوتگ ءُ آئی ءَ چہ پد دیم ءِ بال ءَ منیش پانڈے ھم آؤٹ بوتگ –
راجستھان ءِ نیمگ ءَ ھاسکر یشسوی جیسوال سِی بالاں یانزدہ چوکا ءُ یک چکائے جتگ ءُ شست رن جوڈ کتگ – آئی ءَ وتی نیم سنچری بیست ءُ پنچ بالانی تہ ءَ سرجم کتگ – دومی نیمگ ءَ بٹلر ھم چہ آئی ءَ کم نہ بوتگ آئی سِی ءُ دو بالاں نیم سنچری سرجم کتگ – ھردوکاں اولی وکٹ ھاتر ءَ 8.3 اووراں نود ءُ ھشت رن جوڈ کتگ – رجستھان ءِ نیمگ ءَ شمرن ءَ بیست ءُ یک بالاں سِی ءُ نھ رن جوڈ کتگ ءُ ناٹ آؤٹ بوتگ – راجستھان ءَ بست اوورانی تہ ءَ چار وکٹانی تاوان اسکور یکسد ءُ نود ءُ نُھ ءَ سر کتگ –
دھلی ءِ نیمگ ءَ مکیش کمار سوبمند تریں بالر بوتگ کہ آئی ءَ چار اووراں سِی ءُ شش رن داتگ ءُ دو وکٹ گپتگ – یک یک وکٹ ءِ کلدیپ ءَ چار چار اووراں سِی ءُ یک رن داتگ روومن پاویل ءَ دو اووراں ھژدہ رن داتگ ءُ گپتگ –
دھلی ءَ بیست اوورانی تہ ءَ نُھ وکٹانی تاوان ءَ بس یکسد ءُ چِل ءُ دو رن جوڈ کت کتگ ءُ ھمے وڈ پنجاہ ھپت رناں چہ گوازی ءِ کٹگ ءَ بے سوب بوتگ –
راجستھان ءِ نیمگ ءَ ٹرنٹ بولٹ ءُ یجویندر ءَ چار چار اووراں سَے سَے وکٹ گپتگ دو وکٹ روی چندرن یک وکٹ ءِ سندیپ ءَ گپتگ وھدیکہ جیسن سَے اووراں بیست ءُ ھشت رن داتگ ءُ مروگن ءَ یک اوورے ءَ یانزدہ رن داتگ ءُ وکٹ گرگ ءَ بے سوب بوتگ انت –