مرگاپ وئیل: بلوچ رھشونانی کوش ءِ چاردہ سال
ٹی بی پی شونگال
چاردہ سال پیسر سئے اپریل دو ھزار ءُ نھ ءَ چہ تربت ءَ بلوچستان اسمبلی ءِ پیسرگیں اپوزیشن رھشون کچکول علی ایڈوکیٹ ءِ کارگس ءَ بلوچ نیشنل موومنٹ ءِ چیئرمین غلام محمد بلوچ، بی این ایم ءِ رھشون لالا منیر بلوچ ءُ بلوچ ریپبلکن پارٹی ءِ ڈپٹی سیکٹری جنرل شیر محمد بلوچ زورانسری بیگواہ کنگ بیتگ اِت اَنت ءُ نھ اپریل ءَ چہ تربت ءَ لھتے کلومیٹر دور مرگاپ ءِ ھند ءَ آیانی زانگولیں جون دزکپتگ اِت اَنت۔
پیپلز پارٹی ءِ سرکار ءَ بلوچ رھشونانی بیگواھی ءُ کوش ءَ ھوار آجوئی ءِ جد ءُ جھد ءَ بندوکیں رھشون ءُ باسکانی زورانسری بیگواھیانی درچ بندات بیت ءُ پد ءَ آیانی زانگولیں جون گیابان ءُ دگانی کَش ءَ دزکپگ بندات بیت اَنت۔ پاکستان ءَ سرکار مَٹ بیان بیت اَنت بلے بلوچستان ءِ جاورانی تہ ءَ گھتری ءَ ابید بدتری آیان بیت ءُ بلوچ آجوئی ءِ جُنز ءَ بندوکیں راجداریں پاٹی ءُ گلانی سُرپرُانی سر ءَ بندش جنگ بوت، کہ اِیشی ءِ یکشلی انگت ھم جتائیں دروشماں برجاہ اَنت۔
پاکستان ءِ راجداریں پاٹی وھدے اپوزیشن ءَ بنت گُڑا آجوئی ءِ جد ءُ جھد ءَ بندوکیں ادارگاں گوں ترانکاری ءِ گمان دے اَنت ءُ بلوچ راج ءِ سر ءَ بیوکیں زلم ءُ زوراکیاں من اَنت۔
دو ھزار ءُ ھشت ءَ پیپلز پارٹی سرکار گرگ ءَ پیسر بلوچستان ءِ تہ ءَ اکبر خان بگٹی ءُ دگہ بازیں بلوچانی کوش، ڈیرہ بگٹی ءُ کوھستان مری ءَ پوجی بیڑ ءُ ھزارانی کچ ءَ مردمانی زورانسری بیگواھی جنرل پرویز مشرف ءِ مستری ءَ پوجی زورشاھی ءَ گوں بندوک کُتگ اِت اَنت۔
پاکستان پیپلز پارٹی ءِ رھشوناں بلوچستان ءِ سُھل کاری ءِ بندات کنان کنان ءَ “آغاز حقوق بلوچستان پیکج” ءِ جار جنان ءَ گُشتگ اَت کہ بلوچستان ءِ اُلس ءَ رھبندی، راجداری ءُ روزیگی اگبال رس انت، پیپلز پارٹی ءِ اھد ءَ بلوچاں اگبال نہ رس ات اَنت بلے بلوچ رھشونانی کوش ءُ سیاسی باسکانی زورانسری بیگواھی ءَ پد زانگولیں جونانی رسگ ءِ درچ ھمایانی ھاکمی ءِ اھد ءَ بندات بیتگ اَت کہ اے تھریک انساپ ءُ مسلم لیگ ءِ سرکار ءِ وھداں ھم اوشتگ ءِ نام اش نہ زانت۔
پاکستان ءِ جتاھیں سرکار ءُ اسٹبلشمنٹ بلوچ راج ءَ گوں سُھل کاری ءِ درشان یکشلی ءَ گوں کنان اَنت بلے بلوچ رھشونانی کوش ءُ زورانسری بیگواھی ءُ بلوچستان ءِ تہ ءَ راجکاری ءِ سر ءَ بندش جنگ ءَ آ سُھل کاری ءِ راھاں بند کنگ ءَ اَنت۔ پاکستان ءِ تاکت وریں واکداراں نی سرپد بئیگ لوٹ ایت کہ گوں تاکت ےَ اگاں پہ وَس ءُ زوراکی بلوچ راجی آجوئی ءِ جُنز ھلاس کُت نہ کن اَنت ءُ آیاں گوں سنگینی ءَ گوں بلوچ جیڑہ ءِ گیوار کنگ ءَ پہ ترانکاری کنگ لوٹ ایت۔