چین ءَ وتی ھمساھگیں ڈیھ ءِ تائیوان ءِ کش ءُ گوراں پوجی سر ءُ مانسرانی ھیلکاری بندات کتگ انت

اے یک بیھاری ءُ سرپدی یے کہ آیانی چم چین ءِ سر ءَ سک اَنت اے ھیلکاری ءِ مستریں مول ھمیش اِنت ءِ چین ءِ سر ءَ چست بیتگیں دستانی جھل کنگ اِنت اے گپانی درشانی چینی پوج ءِ جارکشے ءَ کتگ اَنت-

اے پوجی تر ءُ تابی ھیلکاری داں سَے روچاں برجاہ بیت اِنت-

ھال سرکنوکیں ادارہ اے ایف پی ءِ رد ءَ چین ءِ پوج ءِ یک جارکشے شی پی ءَ شمبے ءِ روچ ءَ گوشتگ مہ اے پوجی ھیلکاری “تائیوان ءِ آجوئی ” ءِ واب ءَ گندوکیں تاکت ءُ ڈنی تاکتانی میان ءَ بیوکیں مسام ءُ آیانی پرکاریانی ھلاپ ءَ یک ترندیں بیھارے ءِ درچ اِنت-

چین ءِ میری ٹائم اتھارٹی ءَ اے ھم گوستگیں دو شمبے ءَ گوشتگ بیتگ کہ پوجیان ءِ زر ءِ توک ءَ تچک ءَ تیرگواری ءِ ھیلکاری ءَ کنگ ءَ اَنت-

چین ءَ تائیوان ءِ سروک ءُ امریکہ ءِ ایوان ءِ اسپیکر ءِ میان ءَ بیتگیں گند ءُ نند ءَ پد وت واجھییں جزیرہ ءِ سرکار ءُ را ترندین کلوہ داتگ اَنت –

چین ءِ پیپلز لبریشن آرمی ءِ ایسٹرن کمانڈ ءَ یک درشانے ءَ گوشتگ کہ “یونائیٹڈ شارپ سورڈ ” ءِ نام ءَ چہ اے موسوم سَے روچاں داں اے آپریشن برجاہ بیت اِنت-

سرکاری ھال سرکنوکیں ایجنسی ژنھوا ءِ رد ءَ پوج ءِ جارکش شی پہ ءَ گوشتگ کہ اے ھیلکاری “آبنائے تائیوان ءِ زر ءِ سیمسری دمگ ءُ برزی پھناتاں جزیرے ءِ گوریچان ءُ زرباری دمگاں چہ دور جزیرے ءِ رودراتک ءَ بیت اِنت-

دمگی میری ٹائم اتھارٹی ءَ دیک درشانے ءَ گوشتگ کہ دوشمبے ءِ روچ ءَ چین ءِ پوجیان اُستان ءِ زر ءَ “لائیو فائر ڈرلز ” کن اَنت کہ چریشی ءَ چہ گندگ بیت اِنت آ تائیوان ءِ دیم پہ دیمی ءَ اِنت-

تائیوان ءِ سروک سائی انگ وین ءِ کیلیفورنیا ءُ امریکہ ءِ ایوانِ نمائندگان ءِ اسپیکر ءَ گوں گند ءُ نند ءُ نند ءَ پد بیجنگ ءَ ھمساھگیں ڈیھ ءِ نزیک ءَ وتی جنگی بوجیگ راہ داتگ انت-

اے ایف پی ءِ رد ءَ چین ءِ جمھوری، وت واجھیں تائیوان ءِ سرڈگار ءَ وتی بھر سرپد بیت اِنت ءُ یک روچے ءَ زلورت ءِ کپگ ءُ تاکت ءِ گون ءَ آئی ءِ سر ءَ بیڑ برگ ءُ دستیگ ءِ کنگ ءِ گمان ءَ کنگ ءَ اِنت-

گوستگیں سال ءَ امریکہ ءِ گوستگیں اسپیکر نینسی پلوسی ءِ تر ءُ تاب ماں تائیوان ءَ بیتگ کہ چریشی پژدر ءَ چین ءَ درستاں مستریں برزی ءُ بھری ھیلکاری بندات کتگ ات اَنت-