پنجگور: پوج ءَ تیل کشیں گاڑیانی سر ءَ تیرگواری کتگ،یک مردمے زدگ

بلوچستان ءُ ایرانی سیمسر ءِ نزیک ءَ جیرک کلگ کور ءَ پاکستانی پوج ءِ تیرگواری ءَ تیل باپاری کنوک مسلم ء شھسوار جھمنند گومازی دز پروم زدگ بوتگ –

وھدیکہ تیرگواری ءَ بازیں گاڑیانی ٹیل ءِ مشک ترک اِتگ انت ءُ مردماں لکّانی کلدار ءِ تاوان بوتگ –

پروم بارڈر کمیٹی ءِ عابد اشرف ءِ رِد ءَ تیل کشیں ھما گاڑیانی سر ءَ تیرگواری کنگ بوتگ کہ واکدارانی داتگیں لڑ آھانی نام ھست انت کہ آھانی تہ ءَ فدا احمد جائین غریب آباد پروم، اللہ بخش جائین غریب آباد پروم، بہادین جائین غریب آباد پروم، شاکر جائین غریب آباد پروم، ساکم جائین غریب آباد پروم، ءُ نواب اللہ بخش گومازی دز پروم ءِ گاڑی ءُ ٹیلاں تاوان رستگ –

آئی ءَ گوشتگ کہ مروچی سھب ءِ ادار ھپت ءَ پروم ءِ دمگ کلگ کور ءَ کہ چہ جیرک بارڈر ءَ بیست دو کلومیٹر دور میتگ یے، پوج ءِ بے سوب ءَ تیرگواری ءَ پانزدہ ءَ گیش مشک ترک اِتگ انت ءُ لکانی ھساب ءَ کلدار ءِ ڈیزل گوں ھاکاں ھوار بوتگ انت ءُ دمگ ءِ تہ ءَ ترس ءِ ودی بوتگ –

وئیل ءِ بگیری ءَ بارڈر کمیٹی پروم ءَ ریش پیش بنجل ءِ دیم ءَ زھرشانی کتگ ءُ وئیل ایرجتگ – بارڈر کمیٹی پروم ءِ سرکماش عارف مول جان، کمک سرکماش بشیر احمد ءَ دگہ مردمانی ھمراھی ءَ پوج ءِ واکداراں گوں گند ءُ نند کتگ –

گند ءُ نند ءَ آھاں وئیل ءِ درگت ءَ سرجمیں ھال داتگ انت ءُ گوشتگ کہ پھازگی لشکر ءَ بید سوب ءَ جیرک بارڈر ءِ سر ءَ ھما گاڑیانی سر ءَ تیرگواری کتگ کہ آھانی نام لڑ ءِ تہ ءَ ھوار انت کہ چریشی ءَ یک مردمے زدگ ءُ لکانی ھساب ءَ کلدار ٹیل زوال بوتگ انت – ھمے میان ءَ آھاں کمیٹی ءِ دیم ءَ گوشتگ کہ لھتے گاڑی والایاں باڈر ءِ تار بُراِتگ ءُ تہ ءَ رؤگ ءِ جھد کتگ ھمے سوب ءَ آھانی سر ءَ تیرگواری کنگ بوتگ کہ چریشی ءَ اے گاڑی ھم تیرانی زد ءَ اتکگ انت – زدگ بوتگیں مردمے الاج ءُ ایندگہ تاوانانی پُر کنگ ءِ باور کنائینگ ءَ پد زھرشانی ھلاس کنگ بوتگ –