بلوچستان ءِ جتاھیں دمگانی تہءَ دیما اتکگیں کَزا ءُ وئیلانی تہءَ 9 مردم بیران بیتگ اَنت وھدیکہ سئے ٹپی اَنت۔
سربیتگیں اھوالانی ردءَ منگچر ءِ ھند چائے مست زرد عبداللہ ءَ دو مردم لطف اللہ ء محمد ایوب لانگو، ٹکری زادہ عبدالشکور ء ٹکری عبدالستار لانگو وتی ٹیوب ویل ءَ کار کنگ ءَ بیتگ اَنت کہ لین ءِ گرگ ءِ سوب ءَ دوھیں ھما دمان ءَ بیران بیتگ اَنت۔
دومی نیمگ ءَ کیچ ءِ شھر تربت چہ سر بیتگیں ھالانی ردءَ 12سالی جِنکویں ٹیوب ویل ءَ کپتگ ءُ بیران بیتگ- ریسکیو واکداراں لاش کش اِتگ ءُ نادراھجاہ ءَ بُرتگ کہ آودہ المی کاراں پد جِنکو ءِ لاش کھولءَ دیگ بیتگ۔
وھدیکہ بلوچستان ءِ دمگ چاغی ءِ حسنی مارکیٹ ءِ نزیکءَ سلاہ بندیں مردماں تیرگواری کُتگ ءُ ڈیرہ اسماعیل خان ءِ جھمنندیں سعید اکبر ء حیات محمد ءُ یک جنینے گلنار بیگم ء شبرات کُشتگ اَنت ءُ چہ وئیل جاہ ءَ تتکگ اَنت۔
چاغی ءِ دمگی واکداراں پولیس گامگیج ءِ تہءَ کوشکارانی دزگیر کنگ ءِ ٹاہ داتگ وھدیکہ لاش المی کارانی کنگ ءَ دالبندین ءَ دیم دیگ بیتگ اَنت۔
بلوچستان ءِ دمگ تمپ ءَ ناشناسیں مردماں تیر گواری کُتگ ءُ صادق نامی ایں مردمے کُشتگ ءُ تتکگ اَنت۔
دومی نیمگ ءَ بلوچستان ءِ بنجاھی شھر شال ءَ چہ سربیتگیں اھوالانی ردءَ شال ءِ سیٹلائٹ ٹاؤن ءَ یک ورناھے ءَ وتءَ گوں پاھو ءَ دراتکگ ءُ وتکُشی کُتگ، وتکُشی کنوکیں ورناھے پجار محمد حسن ترین نام ءَ بیتگ، داں انگت وتکُشی ءِ وئیل ءِ سوب زانگ نہ بیتگ اَنت۔
وھدیکہ بلوچستان ءِ دمگ دالبندین ءِ ھند کرودک ءِ نزیک ءَ زمین ءِ جیڑہ ءِ سرءَ یکیں ٹک ءِ دو ٹولیانی نیام ءَ جنگ بیتگ۔ کہ اِشی آسر ءَ تیر گواریانی سوب ءَ 2 مردم مُرتگ اَنت وھدیکہ 3 مردم سک ٹپی بیتگ اَنت، بیران بیتگیں ءُ ٹپی بیتگیں مردمانی سیادی گوں محمد حسنی ٹک ءَ گوں گُشگ بیگ ءَ اِنت۔
نادراھجاہ ءِ اھوالانی ردءَ محمد آصف ء حاجی بدل خان ءُ عبدالکریم ء گمی خان بیران بیتگ اَنت وھدیکہ ٹپیانی تہءَ گل خان ء حاجی بدل خان،جان محمد ء گمی خان،حاجی بدل خان ء گمی خان ھوار اَنت۔ دمگی واکدارانی ردءَ وئیل ءِ بابت ءَ گیشتر پَٹ پول پولیس کنگ ءَ اِنت۔