بلوچستان ءِ دو جتاھیں دمگ خضدار ءُ قلات ءَ چہ پاکستانی لشکریاں دو مردم دزگیر کنگ ءَ پد ناشناسیں ھنداں بُرتگ اَنت وھدیکہ چہ کیچ ءَ یک مردمے یل بیتگ ءُ وتی لوگءَ سربیتگ۔
اھوالانی ردءَ خضدار ءِ ھند سول کالونی ءَ چہ پاکستان لشکریاں یک نودربرے دزگیر کنگ ءَ پد ناشناسیں جاھاں بُرتگ۔
بیگواہ کنگ بیتگیں ورناھے پجار ابرار جتک ءِ نام ءَ چہ بیتگ۔
دومی نیمگ ءَ قلات ءِ ھنکین منگچر ءَ چہ اھوال اَنت کہ گوستگیں روچاں لشکریاں یک دکانے ءِ سرءَ بیڑ برتگ ءُ ساول ء مہر اللہ جھمنند منگچر دزگیر کنگ ءَ پد ناشناسیں جاھاں بُرتگ۔
دومی نیمگ ءَ کیچ ءِ بنجاھی شھر تُربت زامرانی بازار ءَ چہ پاکستانی لشکریانی دستءَ بیگواہ کنگ بیتگیں وارث ء موسیٰ مروچی یل کنگ بیتگ ءُ وتی لوگءَ سربیتگ۔
زانگ بہ بیت کہ وارث موسی ھمے سال ءَ 27 مارچ ءِ شپ ءَ لشکریاں چہ لوگ ءَ دزگیر کنگ ءَ پد بیگواہ کُتگ اَت کھول ءَ آئی یل بئیگ ءِ ھال راست کُتگ۔