بلوچستان ءَ جتا جتائیں وئیلاں زھگے بیران، ھژدہ مردم زدگ ءُ یک جونے دست کپتگ

بلوچستان ءِ جتا جتائیں ھند ءُ دمگاں بوتگیں وئیلاں سرجمی ءَ یک زھگے بیران وھدیکہ زالبولے ءَ ھوار ھژدہ مردم زدگ بوتگ انت ءُ یک جونے دست کپتگ –

گیشیں ھالانی رِد ءَ سبی ءِ دمگ بس اڈہ ءِ نزیک ءَ ٹریکٹر ءِ ڈیکر کنگ ءَ رحمت اللہ ء عطا محمد نامیں زھگے بیران بوتگ –

دومی نیمگ ءَ لورلائی میختر ءِ نزیک ءَ کوٹکی ءِ دمگ درگ ءَ آؤکیں پک اپ گاڑی ءِ وئیل ءِ آماچ بوتگ – چریشی ءَ زالبولے ءَ ھوار دو مردم زدگ بوتگ انت، زدگ بوتگیں مردمانی تہ ءَ یکے ءِ جاور نگیگ انت –

ھمے وڑ زیارت ءِ نزیک ءَ چہ احمدون ءَ دیم پہ زیارت ءَ رؤکیں وین گاڑی ءِ کنڈ ءَ کپتگ کہ چریشی ءَ وین ءَ سواریں زالبولے ءَ ھوار چاردہ مردم زدگ بوتگ انت –

یک دگہ وئیلے ھزدار ءَ بوتگ کہ تیرگواری ءِ سوب ءَ بی این پی ءِ جنرل سیکٹری محمد بخش مینگل زدگ بوتگ –

دومی نیمگ ءَ کیساک ءِ جھمنند سَے روچاں گاریں یانزدہ سالی جنکو انار گل ءِ جون کیساک کور ءَ چات ءِ تہ ءَ دست کپتگ –

دمگی واکدارانی رِد ءَ ریسکیو ءَ زھگ ءِ جون ءِ درکنگ ءَ بازیں دلسیاھی ءِ دیمپانی کنگ کپتگ ءُ چہ شال ءَ مشینری لوٹارینگ بوتگ – ھمے گوشگ بوگ ءَ انت کہ زھگ چات ءِ تہ ءَ زور دور دیگ بوتگ –