ھندوستان: ریاست اسکم ءَ برپانی کرود ءِ کپگ ءَ ھپت مردم بیران، بیست زدگ

ھندوستان ءِ دمگ ھمالاین ریاست اسکم ءَ پرپانی کرود ءِ کپگ ءَ ھپت تر ءُ تاب کنوکیں مردم بیران بیتگ اَنت بیست زدگ بیتگ اَنت-

ھال سرکنوکیں ادارہ روئٹرز ءِ رد ءَ چارشمبے ءِ سھب ءَ ریسکیو ٹیم وئیل جاہ ءَ سر بیتگ اَنت ءُ یک رندے پد ءَ وئیل جاہ ٹپاسگ بیتگ چیر تر اتگیں مردم کشگ بنت یا ناں-

سَے شمبے ءِ روچ ءَ ھندوستان ءُ چین ءِ سیمسری ھند نتھولا پاس ءِ ھند ءَ تر ءُ تاب کنوکیں مردم گوزگ ءَ بیتگ اَنت ناگتی برپانی کرودے کپتگ-

ریسکیو ٹیم ھما دمان ءَ سر بیتگ اَنت ءُ بیست مردم اش زندگی ءَ کش اتگ اَنت بلے داں انگت ءَ موسم ءِ ھرابی ءُ تھاری ءِ سبب ءَ ریسکیو ءِ ٹیم ءَ وتی پٹ ءُ پول کنگ بند کنگ کپتگ –

اسکم پولیس ءِ چیف ٹینزنگ لوڈن ءَ روئٹرز ءَ گوں تران کنان ءَ گوشتگ کہ چار شمبے ءِ سھب ءَ ریسکیو آپریشن دوبارہ بندات کنگ بیتگ –

آئی ءَ گوشتگ کہ آپریشن بند کنگ ءَ پیسرسرجمی ءَ سجوئیں دمگ الکاپ ءَ پٹ ءُ پول کنگی اِنت – سر وزیر نریندر مودی ءَ وئیل ءِ سر ءَ پدردی درشان کنان ءَ سرجمیں مردماناں کمک کنگ ءِ ھکم داتگ-

مارچ ءِ ماہ ءَ ریاست اسکم ءَ یکشل ءَ برپ گواری برجاہ اَنت ءُ نتھولا پاس ءَ تر ءُ تاب کنوکیں مردمانی رپت ءُ آمد داں سیزدہ میل ءَ دارگ بیت اِنت ھمے وڑ ءَ پیش اتکگین وئیلاں تر ءُ تاب کنوکیں مردماناں پانزدہ میل ءَ داں روگ ءَ اشتگ اَنت ءُ گڑا برپانی کرود کپتگ اَنت-

گوستگیں دو سالانی توک ءَ ھندوستان ءِ ھمالیہ ءَ برپانی کرود ءِ کپگ ءِ سبب ءَ کم چہ کم یک سد ءُ بیست مردم بیران بیتگ اَنت – امریکہ ءِ نیشنل اکیڈمی آف سائنسز ءِ رد ءَ دوھزار ءُ ھژدہ ءَ بیوکیں یک اسٹڈی ءِ اے گپ دیم ءَ اتکگ ات کہ موسمانی رد ءُ بدلی ءِ سبب ءَ برپانی کرودانی کپگ ءِ گمانی ھست اِنت-