روکپتی بلوچستان ءَ ایرانی لشکر ءِ تیرگواری ءَ دو مردم بیران ءُ یکے دگ ءِ وئیل ءَ بیران بیتگ

وئیل زر آباد، سراوان، اسپکہ ءَ پیش اتکگ اَنت کہ اود ءَ تیرگواری ءُ دگ ءِ وئیلاں سَے مردم مرگ ءِ ارجان بیتگ اَنت-

سر بیتگیں ھالانی رد ءَ روکپتی بلوچستان ءِ دمگ زرآباد ءَ یل تیل کشیں گاڑی ءِ کپگ ءَ یک ورنایے بیران بیتگ –

ورنا ءِ پجار محمود ء قادر داد ءِ جھمنند اسماعیل چات ءِ نام ءَ زانگ بیتگ –

ھالانی رد ءَ قادر داد ءِ یک زھگے لھتے ماہ ءَ پیش ھم ھمے وڑ ءَ دگ ءِ وئیل ءِ آماچ بیتگ ءُ بیران بیتگ –

روکپتی بلوچستان ءَ دگ ءِ وئیلانی تہ ءَ گیشتریں مردم کہ مرگ ءَ اَنت آ تیل ءِ باپار ءَ گوں بندوکیں مردم اَنت – گوستگیں ھپتگ ءَ نُھ کس ھمے رنگ ءَ بیران بیتگ اَنت-

دومی نیمگ ءَ روکپتی بلوچستان ءِ دمگ شستون سراوان ءَ ایرانی لشکر ءَ تیرگواری کنان ءَ یک مردمے کُشتگ-

کشگ بیتگیں مردم ءِ پجار حسن سیاھانی ء یار مھمد جھمنند نگان سراوان ءِ نام ءَ زانگ بیتگ کہ آ ایرانی لشکر ءَ ابید دست دیگ ءَ آئی ءِ سر ءَ تیرگواری کنان ءَ کُشتگ-

ھمے وڑ ءَ اسپکہ ءَ ایرانی بسیج ءَ تیرگواری کنان ءَ یک مردمے کشتگ-

کُشگ بیتگیں مردم ءِ پجار اسلام درخانی ء حسین جھمنند اسپکہ ءِ نام ءَ زانگ بیتگ-

زانگ بہ بیت روکپتی بلوچستان ءَ ایرانی لشکر ءِ نیمگ ءَ تیرگواریانی ھال گوست ءَ ھم شنگ ءُ تالان بیتگ اَنت –