زورانسری آوار جتگیں مردمانی کھولانی درد
ٹی بی پی شونگال
زورانسری بیگواھیں رشید بلوچ ءِ مات گوستگیں پنچ سالاں چہ وتی بَچ ءِ یل بیگ ءِ اوست ءَ چہ آگ جھان ءَ رپت۔ علی اصغر بنگلزئی ءِ زورانسری بیگواھی ءَ دو دھک سرجم بیتگ اَنت، سمیع بلوچ ءِ کماش ءَ داں دوازدہ سالاں آئی ءَ ودار کُت ءُ چہ اے جھان ءَ پہ مدامی رپت۔ ڈاکٹر اکبر مری ءِ زھگ گوستگیں چاردہ سالاں وتی کماش ءِ ودار ءَ روچاں گوازینگ ءَ اِنت۔ علی حیدر ءَ وتی کسان سالیگیں زند پریس کلبانی دیم ءَ زھرشانیانی تہ ءَ گوازینت بلے آئی ءِ ودار پہ پِت ءِ واتری ءَ داں آسر نہ بیتگ۔ سمی ءُ مِھلب چاردہ سالاں چہ ڈاکٹر دین محمد ءِ واتری ءَ پہ وھد ءَ ھساب کنگ ءَ اَنت ءُ توتک ءِ قلندرانی کھول یک دھکے ءَ چہ وتی دوستیگانی وداریگ اَنت۔ اے بلوچستان ءَ زورانسری بیگواھی ءِ آماچ بیتگیں ھزاراں کھولاں چہ لھتینانی کسہ اَنت۔
اکتوبر سال دو ھزار ءُ نھ ءَ زورانسری بیگواھیں مردمانی کھولاں وائس فار بلوچ مِسنگ پرسنز ءِ بنُھشت ایر کُتگ اَت گوں ھمے واھگ ءَ کہ بوت کنت گوں ھواریں جد ءُ جھد ءَ آیانی دوستیگ یل کنگ بہ بنت بلے وائس فار بلوچ مِسنگ پرسنز ءِ زھرشانی بنجل ءَ پنچ ھزار روچ سرجم بیتگ اَنت ءُ انگت ھم بلوچستان ءَ زورانسری بیگواھیانی یکشلی برجاہ اِنت ءُ بلوچ مات وتی بچانی ودارانی تہ ءَ اے جھان ءَ یل دئیگ ءَ اَنت۔
رشید بلوچ ءِ مات ءَ پنچ سالانی تہ ءَ وتی چُک ءِ یل کنائینگ ءَ پہ آمید گسانی در ٹُک اِتگ اَنت ءُ خضدار ءُ شال ءَ وائس فار بلوچ مِسنگ پرسنز ءِ زھرشانیاں ھم ھوار بیتگ ءُ وتی زھگ ءِ یل کنائینگ ءَ پہ توار چِست کُتگ اَت بلے زھگ یل نہ بوت ءُ زورانسری بیگواھیں زھگ ءِ دردانی پجیگ ءَ آ چہ اے جھان ءَ رپت۔
وائس فار بلوچ مِسنگ پرسنز ءِ سروک ماما قدیر بلوچ ءَ وتی ورناھیں بچ ءِ زورانسری بیگواھی ءَ پد تیرسبتگیں جون ءِ دزگرگ ءَ پد ھم پُر امیت اَنت زھرشانی جنُز بیگواھیں مردمانی یل کنائنگ ءِ سوب جوڑ بیت اَنت ءُ آ گُش ایت کہ داں بیت کہ آ بیگواھیں مردمانی آجوئی ءِ جُنز ءَ برجاہ داریت۔
زورانسری بیگواھیانی سوب ءَ بلوچستان ءَ مردمانی درد بندات بیتگ اَنت، کہ چریشی ءَ ھزارانی کھول سانمند اَنت ءُ ھمک روچی ءِ رد ءَ بیگواھیانی تہ ءَ گیشی پیداک اِنت۔ بلوچستان ءُ پاکستان ءِ سیاسی پاٹی وھدے اپوزیشن ءَ بنت گُڑا اے سنگینیں جیڑھے ءِ سر ءَ توار چِست کن اَنت بلے سرکار ءَ آیگ ءَ پد ھاموش بنت۔ بلوچستان ءَ برجاھیں زورانسری بیگواھی ءِ پئیمیں سنگینیں جیڑھے گیواری درگیجگ نہ بیت گُڑا اِدے جاور گنتریں ھرابیانی آماچ بنت اِنت۔