ھندوستانی نیوز چینل ءِ سر ءَ وساچیں ھژاری (آرٹی فیشل انٹیلی جینس) ءَ گوں جوڑ کُتگیں اھوالکار ءِ پیش دراھی کنگ بیتگ۔
آرٹی فیشل انٹیلی جینس (اے آئی) ٹیکنا لوجی ءَ گوں جوڑ کُتگیں اھوالکار ثنا ءَ انگریزی زبان ءِ تہ ءَ برجاھیں مولمی اھوالاں چہ چاروک آشنا کُتگ اَنت۔ اے آئی اینکر ثنا بازیں زبانانی تہءَ گپ کنگ ءِ سنچ ءَ ھم دار ایت۔
زانگ بہ بیت وساچیں ھژاری اے وھدءَ سرجمیں جھان ءَ گپ ءُ تران ءِ بنگپ جوڑ بیتگ۔ وساچیں ھژاری ءِ جوانی وتی جاہ ءَ بلے اِشی گمانی تاواناں چہ ھم زانتکاراں ھبر دار کُتگ۔ زانتکارانی ردءَ چیٹ جی پی ٹی ءُ دگہ وساچیں ھژاری ءِ نوکتریں جھلانکی ءِ سوب ءَ 300 ملین روزگار وتکار بیت کُت کن اَنت۔
انسانیت ءَ پہ پیش بیوکیں گمانی تُرس ءِ پد ءَ ٹوئیٹر ءِ واھند ایلون مسک ءَ ھوار جھان ءِ بازیں پرُ ارژشتیں مردم تاکتوریں وساچیں ھژاری ءِ سر ءَ برجاھیں کارءَ دارگ لوٹ اَنت۔
یک پچیں نمدی ءِ تہ ءَ اے درستیں مردماں ھژار کنان ءَ گُشتگ کہ وساچیں ھژاری ءِ جوڑ کنگ ءِ کار چہ دست ءَ دراَتکگ۔