ھاران ءَ پوج ءِ دست ءَ یک مردمے آوار جنی ءَ پد بیگواہ، مستونگ ءَ دگہ جون ءِ دست کپتگ

سربوتگیں ھالانی رِد ءَ بلوچستان ءِ دمگ ھاران ءَ گوستگیں روچ ءَ پاکستانی پوج ءُ چیریں ادارھانی کارمنداں ورنایے چہ جند ءِ گِس ءَ زورانسری آوار جتگ ءُ بیگواہ کتگ، وھدیکہ بلوچستان ءِ دمگ مستونگ ءَ یک دگہ ژانگولیں جون ءِ دست کپتگ –

گیشیں ھالانی رِد ءَ گوستگیں روچ ءَ پوج ءَ ھاران ءِ دمگ کلان ءَ لشکر کشی ءِ میان ءَ بیبگر بلوچ نامی مردمے آوار جتگ ءُ گوں وت برتگ –

پوج ءِ دست ءَ آوار جنگ بوتگیں ورنا تنی وھدی زاھر کنگ نہ بوتگ –

بلوچستان ءَ زورانسری آوارجنیانی درچ ءِ تہ ءَ روچ پہ روچ گیشی آیان انت کہ ھمک روچ مردمانی زورانسری آوار جنی ءِ ھال پیداک انت –

ٹی بی پی ءِ کچ ءُ کساس ءِ رِد ءَ مارچ ماہ ءِ اولی دوئیں ھپتگاں سرجمیں بلوچستان ءَ چِل ءُ دو مردم زورانسری آوار جنی ءِ آماچ بوتگ کہ آھانی تہ ءَ لھتے یل بوتگ وھدیکہ سَے ھپتگانی میان ءَ چار مردمانی جون دست کپتگ انت –

ھالانی رِد ءَ لیویز تانہ ولی خان ءَ بیست ءُ دو رمس ءَ جنگل ءَ یک پھلے ءِ چیر ءَ جون ءِ دست کپتگ کہ تنی وھدی آئی ءِ پجار نہ بوتگ –

جون پہ پجار ءِ ھاتر ءَ شال سول نادراھجاہ ءَ آرگ بوتگ بلے پدا ھم یک ھپتگے ءِ گوزگ ءَ پد ھم جون ءِ پجار نہ بوتگ ءُ آئی ءِ وارس دست نہ کپتگ انت –

زانگ بہ بیت گوستگیں ھپتگ ءَ جنگل کراس ءَ دست کپتگیں یک دگہ مردمی ءِ دست کپتگیں جون ءِ پجار کنگ نہ بوتگ –

پولیس ءَ پہ پجار ءِ ھاتر ءَ جون مستونگ ءِ ڈی ایچ کیو نادراھجاہ ءَ سرکتگ بلے تنی وھدی آئی ءِ پجار کنگ ءِ ھاتر ءَ پولیس ءُ واکدار سوبمند نہ بوتگ انت –

زانگ بہ بیت گوست ءَ ھم بلوچستان ءَ ژانگول ءُ بے وارسیں جون دست کپتگ انت – اے دابیں جون گیشتر کوھی دمگاں دست کپ انت – اے گیشتر ژانگول بنت ءُ آھانی پجار کنگ سک گران انت –