اوگانستان ءَ وزیر خارجہ ءِ کارگس ءِ نزیک ءَ وتکش بمب تراک ءَ شش مردم بیران

اوگانستان ءِ بنجاھی شھر ءَ وزیر خارجہ ءِ کارگس ءِ پھازگی گیٹ ءِ دپ ءَ وتکشے ءَ وت ءَ گوں تراکناکیں شورواں تراکینتگ –

وئیل ءِ درگت ءَ تالبان سرکار ءِ جارکش ءَ وتی شنگ کرتگیں درشان ءِ تہ ءَ شش مردمانی بیران بوگ ءِ ھبر راست کتگ ءُ گوشتگ کہ وتکش کنوک پھازگی پانگس ءَ دارگ ءِ اشارہ کتگ بوتگ-

جارکش ءِ رِد ءَ وتکش کنوک نہ اشتاتگ گڈا پھازگی کارمند ءَ آئی ءِ سر ءَ تیرگواری کتگ کہ چریشی ءَ آ زدگ بوتگ ءُ کپتگ ءُ ھما وھد ءَ وت ءَ تراکینتگ یے –

وتکشیں اُرش ءَ دھ ءَ گیش مردم زدگ بوتگ انت کہ ھما دمان ءَ.نزیکیں نادراھجاہ ءَ سر کنگ بوتگ انت ءُ آھانی تہ ءَ سَے مردمانی جاور نگیگ انت – بیران بوتگیں درسیں مردم لس مردم انت بلے زدگ بوتگیں مردمانی تہ ءَ پھازگی کارمند ھوار انت –

واکدارانی رِد ءَ اُرشکار ءِ چار ءُ ٹپاس بوگ ءَ انت بلے تنی وھدی آئی ءِ پجار نہ بوتگ ءُ تنی وھدی ھچ کس ءَ اے اُرش ءِ زمّہ واری نہ منّ اِتگ –

زانگ بہ بیت کہ تالبانانی واکداری ءِ آیگ ءَ پد پھازگی کارمند، سرکاری کارگس ءُ آمام بارگاھانی سر ءَ بوتگیں اُرشاں داعش خراسان دست مان بوتگ –

تالبانانی گوشگ انت کہ آھاں ھمے زوتاں داعش خراسان ءِ بگیری ءَ گامگیج زرتگ ءُ سوبمند ھم بوتگ انت ءُ داعش بر صغیر ءِ سروک ءَ ھوار یک مزنیں کماندار ءِ پوجی آپریشن ءَ کشتگ –

زانوگرانی گوشگ انت کہ مروچی وزیر خارجہ ءِ کارگس ءَ بوتگیں وتکشیں اُرش داعش خراسان ءِ بیر گرگ بوت کنت – زانگ بہ بیت گوستگیں شش ماھانی تہ ءَ اوگانستان ءِ وزیر خارجہ ءِ کارگس ءَ بوتگیں اے سیمی مزنیں اُرش انت –